Трамп Мексикага ҳужумга тайёргарлик кўрилаётганини эълон қилди
АҚШ президенти наркокартелларга қарши қуруқликдаги зарбалар берилишини эълон қилди.
АҚШ президенти Доналд Трамп Fox News телеканалига берган интервьюсида Мексика ҳудудида фаолият юритаётган гиёҳванд моддалар картелларига қарши қуруқликдаги операциялар ва аниқ зарбалар амалга оширилишини эълон қилди.
Давлат раҳбарининг таъкидлашича, АҚШ томонидан денгиз йўллари орқали амалга оширилаётган гиёҳванд моддалар контрабандасининг 97 фоизи тўхтатилган. Эндиликда асосий эътибор қуруқликдаги картеллар фаолиятига қаратилади.
“Биз денгиз орқали олиб кирилаётган гиёҳванд моддалар савдосининг 97 фоизини тўхтатдик. Энди қуруқликдаги картелларга зарба беришни бошлаймиз. Мексикани гиёҳванд моддалар картеллари бошқараяпти”, — деди Доналд Трамп.
Шу билан бирга, АҚШ президенти мазкур операцияларни қачон бошлаш масаласида аниқ муддатларни очиқламади.
Эслатиб ўтилишича, 5 январь куни Доналд Трамп ҳарбий ҳаракатлар Колумбия ҳудудига ҳам ёйилиши мумкинлигини истисно этмаган эди. У мамлакатни “жуда касал” дея баҳолаб, у ерда кокаин ишлаб чиқариш ва уни Қўшма Штатларга етказиб бериш билан шуғулланаётган кучлар фаолиятини танқид қилган.
