V Пара Осиё ўйинларида Ўзбекистон умумжамоа ҳисобида биринчи ўринни эгаллади
Ўзбекистон делегацияси 99 та олтин медални қўлга киритиб, 35 та давлат орасида етакчи бўлди.
2025 йил 7–14 декабрь кунлари Бирлашган Араб Амирликларининг Дубай шаҳрида бўлиб ўтган V Пара Осиё ўйинларида Ўзбекистон делегацияси юксак натижа қайд этиб, умумжамоа ҳисобида биринчи ўринни эгаллади.
Нуфузли мусобақада Осиёнинг 35 та давлатидан 1500 нафарга яқин спортчи 11 та спорт тури бўйича ғолиблик учун баҳс олиб борди. Ўзбекистон пара спортчилари пара енгил атлетика, пара таэквондо, бочча, пара сузиш, пара армрестлинг ҳамда пара пауэрлифтинг йўналишларида иштирок этди.
Мусобақалар якунига кўра, Ўзбекистон делегацияси жами 197 та медаль — 99 та олтин, 57 та кумуш ва 41 та бронза медалини қўлга киритиб, умумий ҳисобда мусобақа етакчисига айланди.
Маълумот учун, 2021 йилда Баҳрайнда ўтказилган IV Пара Осиё ўйинларида Ўзбекистон терма жамоаси 16 та медаль билан умумжамоа ҳисобида 6-ўринни эгаллаган эди.
V Пара Осиё ўйинларида тарихий натижа қайд этган Ўзбекистон спорт делегацияси Ватанга қайтгач, Тошкент шаҳридаги «Ҳумо» халқаро аэропортида тантанали равишда кутиб олинди. Кутиб олиш маросимида расмийлар, спорт жамоатчилиги вакиллари, спорт фахрийлари, оммавий ахборот воситалари ҳамда мухлислар иштирок этди.
Таъкидланишича, мазкур ютуқ мамлакатда пара спортни ривожлантиришга қаратилаётган тизимли ислоҳотлар, спортчилар учун яратилган шароитлар ҳамда мураббийлар меҳнатининг амалий самарасидир.
