Хитойлик жарроҳлар тиббиёт тарихида илк бор ноёб операцияни амалга оширди — узилиб кетган қулоқ вақтинча беморнинг оёғига кўчирилиб, бир неча ой ўтгач яна бош қисмига қайта ўрнатилди. Бу ҳақда South China Morning Post нашри хабар берди.
Маълум қилинишича, бемор аёл апрель ойида оғир техника билан ишлаётган пайтда бахтсиз ҳодисага учраб, қулоғидан айрилган. Ҳодиса оқибатида унинг бош териси, бўйни ва юз қисми жиддий шикастланган. Шифохонага ҳаёт учун хавфли ҳолатда етказилган беморда қулоқни анъанавий усулда тиклаш имконсиз бўлган.
Шу сабабли жарроҳлар ноодатий ечимни танлаб, қулоқни вақтинча оёқнинг юқори қисмига трансплантация қилган. Бунга оёқдаги артерия ва веналарнинг диаметри қулоқ томирлари билан мос келиши асос бўлган. Дастлабки операция тахминан 10 соат давом этган бўлиб, унинг мураккаблиги қулоқдаги қон томирларининг ниҳоятда кичик — атиги 0,2–0,3 миллиметр бўлиши билан боғлиқ.
Шунингдек, беморнинг бош терисини тиклаш учун қорин соҳасидан тери кўчириб ўтказилган. Беш ой ўтгач, жароҳатлар битгач, октябрь ойида қулоқни асл жойига қайтариш бўйича 6 соатлик якуний операция амалга оширилган. Ушбу амалиёт тиббиётда янги ва ноёб жаҳон тажрибаси сифатида эътироф этилди.