Олий суд Пленумининг навбатдаги мажлисида Бош прокурор томонидан киритилган тақдимнома кўриб чиқилди. Тақдимномада жиноят ишлари бўйича Хонобод шаҳар суди раиси Ю.Э.ни Ўзбекистон Республикаси Жиноят кодексининг 168-моддаси 4-қисми “а” банди ва 28, 211-моддаси 3-қисми “а” банди билан жиноий жавобгарликка тортиш, шунингдек, унга нисбатан “қамоққа олиш” эҳтиёт чорасини қўллаш масаласи баён қилинган эди. Мажлис якунида мазкур тақдимномага розилик берилди.
Тақдимномага кўра, суд раиси Ю.Э. илгари бошқа суд томонидан тайинланган озодликдан маҳрум қилиш жазоси муддатини камайтириш эвазига, судланган шахснинг онасидан 30 000 АҚШ доллари миқдорида пул олган вақтида ҳуқуқни муҳофаза қилувчи органлар томонидан ўтказилган тезкор тадбирда қўлга олинган.
Олий суд таъкидлайдики, суд тизимида коррупцияга қарши кураш, тизимни ноҳалол кадрлардан тозалаш ва интизомий назоратни кучайтириш борасидаги қатъий чоралар давом эттирилмоқда. Энг аввало, судьялар ва суд тизими ходимлари ўртасида ножўя хатти-ҳаракатларнинг олдини олиш, коррупцион ҳолатлар юзасидан назоратни кучайтириш ҳамда бундай ҳолатларга йўл қўйганларга нисбатан кескин чоралар кўриш устувор вазифа этиб белгиланмоқда.
Олий суднинг жиноят ишлари бўйича судлов ҳайъати томонидан 2025 йил 17 октабр куни эълон қилинган ҳукмга кўра, 1974 йилда Андижон вилоятида туғилган Ю.Э. юқоридаги моддалар билан айбли деб топилди ва унга 10,5 йил муддатга озодликдан маҳрум қилиш жазоси тайинланди. Шунингдек, у 2,5 йил давомида мансаб ва суд-ҳуқуқ тизимидаги лавозимларда ишлаш ҳуқуқидан маҳрум қилинди.
Шу билан бирга, биринчи инстанция суди ҳукмига нисбатан тарафлар қонунда белгиланган тартибда апелляция ёки кассация шикояти бериш ҳамда протест келтириш ҳуқуқига эга эканлиги маълум қилинади.