“Кўп санъаткорлар саводсизлигини кўрсатиб қўйди” - Озодбек Назарбеков

 

Маданият вазири Озодбек Назарбеков санъаткорларнинг солиқ тўлаш тартиби ва бу борада жамоатчиликда юзага келган муҳокамалар юзасидан муносабат билдирди.

 

Вазирнинг таъкидлашича, санъаткорлар учун алоҳида “солиқ тўламаяпти” деган ҳолат мавжуд эмас ва улар амалдаги солиқ қонунчилигига мувофиқ барча тегишли тўловларни амалга ошириб келмоқда. Унинг сўзларига кўра, тўй, концерт ва бошқа ижодий фаолиятдан олинадиган даромадлар ҳам умумий тартибда солиққа тортилади.

 

Шунингдек, у сўнгги вақтларда санъат вакилларининг солиқ тизими юзасидан билдирган айрим фикрларига муносабат билдириб, бу масалада нотўғри тушунча ва турли талқинлар мавжудлигини қайд этди. Вазирнинг айтишича, санъаткорларнинг ўзлари ҳам амалда солиқ тўлаётган бўлсада, бу жараённинг ҳуқуқий асослари ва механизмлари баъзан нотўғри талқин қилинмоқда.

 

“Биринчидан, муҳокама қилинаётган лойиҳа ҳали тасдиқлангани йўқ. Мана шу банд ўртага чиққанда ҳам жуда кўп санъаткорлар юзини кўрсатиб қўйди кимлигиники, биринчидан саводсизлигини кўрсатиб қўйди. Умуман солиқ ҳақида ҳеч қанақа билимга эга эмаслигини кўрсатиб қўйди. Иккинчидан, санъаткорлар аллақачон солиқ тўлаб келмоқда. Улар тўламаяпти деган фикрлар асоссиз. Масала солиқ тўлаш ёки тўламасликда эмас, балки амалдаги тизимнинг қанчалик самарали ва соғлом эканидадир”, — деди вазир.

 

Вазир шунингдек, солиқнинг давлат ҳаётидаги ўрни ҳақида ҳам тўхталиб ўтди. Унинг сўзларига кўра, солиқлар орқали давлат бюджети шакллантирилади ва бу маблағлар ҳисобидан таълим, соғлиқни сақлаш, инфратузилма ҳамда ижтимоий ҳимоя тизимлари молиялаштирилади.

 

“Солиқ тўламайдиган ҳеч ким йўқ. Ҳар бир касб вакили, жумладан санъаткорлар ҳам бу тизимнинг бир қисми”, — деди Озодбек Назарбеков.

 

Унинг қўшимча қилишича, давлат томонидан яратилаётган шароитлар, тинчлик ва ижтимоий барқарорлик ҳам айнан солиқ тушумлари ҳисобига таъминланади.