Дубайда қозоғистонлик 22 ёшли йигит умрбод қамоқ жазосига ҳукм қилинди

Бирлашган Араб Амирликларининг Дубай шаҳрида 22 ёшли Қозоғистон фуқароси оғир жиноятларда айбдор деб топилиб, умрбод озодликдан маҳрум этилди. Бу ҳақда Қозоғистон Ташқи ишлар вазирлигига таяниб, Tengrinews хабар берди.

 

Вазирлик маълумотларига кўра, 2026 йил 18 март куни Дубай биринчи инстанция суди ушбу фуқарони бир нечта оғир жиноятларда айбдор деб топган ва унга нисбатан умрбод қамоқ жазоси ҳамда жарима тайинлаган.

 

Расмийларга кўра, суд ҳукми устидан апелляция шикояти киритилган бўлиб, ҳозирча қарор қонуний кучга кирмаган.

 

Қайд этилишича, Қозоғистоннинг БААдаги элчихонаси мамлакат ваколатли органларига расмий сўров юборган. Айни пайтда жавоб кутилмоқда. Дубайдаги Қозоғистон Бош консулхонаси томонидан фуқарога зарур консуллик-ҳуқуқий ёрдам кўрсатилаётгани, масала вазирлик назоратида экани билдирилди.

 

Аввалроқ маҳкумнинг яқинлари унинг 2024 йилда ишлаш мақсадида БААга борганини ва у ерда ҳайдовчи бўлиб ишлаганини маълум қилган. Қариндошлари унинг айбдорлигига шубҳа билдириб, йигит туҳмат қурбони бўлиши мумкинлигини таъкидлаган.

 

Айрим ОАВлар мазкур ишни 2025 йил Янги йил кечасида Дубайдаги виллага уюштирилган ҳужум билан боғламоқда. Норасмий маълумотларга кўра, ушбу виллада “Финико” молиявий пирамидаси асосчиларидан бири Эдвард Сабиров яшаган.