Тошкентда ИИО ходими 50 минг доллар порани олмади
Ноқонуний казино тармоғи бўйича тергов вақтида гумондор жиноий жавобгарликдан қочиш учун пора бермоқчи бўлган.
Тошкент шаҳрида криптовалютадан фойдаланган ҳолда ноқонуний қимор ўйинларини ташкил этиш билан шуғулланган уюшган жиноий гуруҳ фаолиятига чек қўйилди.
Тошкент шаҳар Ички ишлар бош бошқармаси матбуот хизмати маълум қилишича, мазкур гуруҳ хорижий онлайн казино платформаларини бошқариш, криптовалюта орқали ноқонуний маблағ айлантириш ҳамда уларни легаллаштириш билан шуғулланган.
Дастлабки тергов ҳаракатлари давомида асосий гумондорлардан бири жиноий жавобгарликдан қочиш мақсадида ИИО ходимига 50 минг АҚШ доллари миқдорида пора таклиф қилган.
Қайд этилишича, ички ишлар органи ходими гумондорни бундай ҳаракатларнинг ноқонунийлиги ҳақида огоҳлантирган. Шунга қарамай, гумондор ўз уринишини давом эттирган.
Шундан сўнг мазкур ҳолат юзасидан раҳбариятга хабар берилган ва тезкор тадбир ўтказилган. Натижада гумондор пул маблағларини топшираётган вақтида қўлга олинган.
Ҳолат юзасидан жиноят иши қўзғатилиб, гумондорга нисбатан қамоқ эҳтиёт чораси қўлланилган. Тергов ҳаракатлари давом эттирилмоқда.
