Янги йилнинг ил кунида энг кўп туғилиш Сурхондарёда қайд этилди
2026 йилнинг 1 январь кунида Ўзбекистонда 1815 нафар чақалоқ дунёга келди. Чақалоқлар орасида 17 нафар эгизак бўлиб, уч ва тўрт нафар эгизаклар ҳам туғилди.
Соғлиқни сақлаш вазирлиги маълумотига кўра, 2026 йил 1 январь куни Ўзбекистонда жами 1 815 нафар чақалоқ дунёга келган. Улардан 894 нафари қиз, 921 нафари эса ўғил болалар ҳисобланади. Бу кўрсаткич сўнгги йиллардаги янги йилнинг илк суткасидаги туғилиш статистикасини давом эттиради.
Таққослаш учун, 2021 йил 1 январда 1 644 нафар, 2022 йилда 2 316 нафар, 2023 йилда 2 155 нафар, 2024 йилда 1 859 нафар ва 2025 йилда 1 641 нафар чақалоқ туғилгани қайд этилган. Жорий йил кўрсаткичи ўртача даражада экани билан ажралиб туради.
Ҳудудлар кесимида энг кўп туғилиш Сурхондарё вилоятида кузатилиб, бу ерда 243 нафар чақалоқ дунёга келган. Кейинги ўринларда Фарғона (216), Наманган (194), Қашқадарё ва Самарқанд (191 нафардан), Андижон (157) ҳамда Тошкент шаҳри (143) қайд этилган. Энг кам кўрсаткич Сирдарё вилоятига тўғри келиб, у ерда 29 нафар чақалоқ туғилган.
Шунингдек, янги йилнинг биринчи кунида туғилган болалар орасида 17 та эгизак ҳолати аниқланган. Улардан 30 нафари икки ҳомилалик, 3 нафари уч ҳомилалик ва 4 нафари тўрт ҳомилалик эгизаклар экани маълум қилинди. Маълумот Соғлиқни сақлаш вазирлиги Матбуот хизмати томонидан тақдим этилди.
