Европа Иттифоқи расмийлари Россия фуқароларига кўп марталик Шенген визаларини беришни тақиқлаш масаласини жорий ҳафта кўриб чиқмоқда. Бу ҳақда Политисо нашри 5 ноябрь куни Европа Иттифоқининг уч нафар расмийсига таяниб хабар берди дейди dw.com нашри.
Лойиҳа қабул қилинса, россияликлар фақат бир марталик (ягона сафар учун) Шенген визаларини олишлари мумкин бўлади. Гуманитар сабабларга кўра Европага келишни режалаштирганлар, шунингдек, Европа Иттифоқи давлатларидан бирининг фуқароси бўлган шахслар учун истиснолар кўзда тутилмоқда.
Маълумотларга кўра, ушбу чорани жорий этиш таклифи Украинадаги уруш билан боғлиқ бўлиб, Россия учун навбатдаги санкция сифатида илгари сурилмоқда. Бироқ, нашр қайд этишича, виза бериш бўйича якуний қарор ҳар бир давлат ҳукуматининг ваколатига киради. Шу боис, ЕИ виза талаблари бўйича умумий қоидаларни қатъийлаштириши мумкин бўлсада, уларни тўлиқ тақиқлаш тўғрисида якка тартибда қарор қабул қила олмайди.
Аввалги чекловлар
2022 йил сентябрь ойида, Украинада кенг кўламли ҳарбий ҳаракатлар бошланганидан сўнг, Европа Иттифоқи Россия билан соддалаштирилган виза тартибини бекор қилган, виза тўловини 35 евродан 80–90 еврогача оширган ҳамда аризаларни кўриб чиқиш муддатини узайтирган эди. Шунингдек, Полша, Латвия, Литва, Эстония ва Чехия каби бир қатор Европа давлатлари россияликларга сайёҳлик визаларини беришни тўхтатган.
Мазкур чоралар ва бошқа санкциялар натижасида Европа Иттифоқига сафар қилаётган Россия фуқаролари сони кескин камайган. 2021 йилда ЕИга 4 миллиондан ортиқ россиялик ташриф буюрган бўлса, бу кўрсаткич 2023 йилда 517 минг, 2024 йилда эса 541 мингни ташкил этган.
2024 йилда россияликларга берилган Шенген визаларининг катта қисми жанубий Европа давлатларига тўғри келган: Италия — 152 мингдан ортиқ, Франция — 124 минг, Испания — 111 минг ҳамда Греция — қарийб 60 минг виза берган. Политисо маълумотига кўра, Венгрия ҳам виза бериш бўйича етакчи давлатлар сафида.