Ички ишлар вазирлиги томонидан тайёрланган қонун лойиҳасида йўл ҳаракати қоидаларини мунтазам равишда бузувчи ҳайдовчиларга нисбатан жавобгарликни кучайтириш таклифи илгари сурилди.
Ҳужжатда қайд этилишича, светафор талабларини бузиш, қарама-қарши йўналишга чиқиш, белгиланган тезликни 40–60 км/соатга ошириш каби хатти-ҳаракатлар оғир оқибатли йўл-транспорт ҳодисаларига сабаб бўлаётгани кузатилмоқда.
Таклифга кўра, бир ой давомида ўн марта қоида бузган шахс охирги қоидабузарлиги учун нафақат жаримага, балки қўшимча тарзда олти ой муддатга ҳайдовчилик гувоҳномасидан маҳрум этиш жазосига тортилиши мумкин.
Ички ишлар вазирлиги бундай чоралар йўл ҳаракати қатнашчилари интизомини мустаҳкамлаш, оғир оқибатли бахтсиз ҳодисалар сонини камайтиришга хизмат қилишини таъкидламоқда.
Қонун лойиҳаси жамоатчилик муҳокамаси учун 25 сентябргача очиқ бўлиб қолади.