“Кабар” агентлигининг Ўзбекистондаги мухбири Тўланбой Қурбонов вафот этди
У 2003 йилдан буён хорижий мухбир сифатида Ўзбекистондаги ижтимоий-сиёсий жараёнларни холис ва тезкор ёритиб келган.
Қирғизистоннинг “Кабар” миллий ахборот агентлигининг Ўзбекистондаги кўп йиллик мухбири, тажрибали журналист Тўланбой Қурбонов вафот этди. Бу ҳақда Ташқи ишлар вазирлиги матбуот котиби хабар берди.
Маълум қилинишича, Тўланбой Қурбонов 1952 йилда Андижон вилоятида туғилган. У ўз фаолияти давомида Ўзбекистон ва Қирғизистон ўртасидаги дўстона муносабатларни ёритишга муносиб ҳисса қўшган ҳамда узоқ йиллар давомида Республика радиосининг қирғиз бўлимида фаолият юритган.
У 2003 йилдан буён Ўзбекистон Ташқи ишлар вазирлиги ҳузурида аккредитациядан ўтган хорижий журналист сифатида мамлакатдаги ижтимоий-сиёсий жараёнларни холис ва тезкор ёритиб келган.
Шунингдек, у қирғиз ва ўзбек халқлари ўртасидаги маданий яқинликни мустаҳкамлашга қаратилган таржима ишлари билан ҳам шуғулланган. Жумладан, Чингиз Айтматов асарларини таржима қилиш орқали маънавий мерос тарғиботига ҳисса қўшган.
