Ўзбекистон Беларусдан 4 минг гектар экин майдонини ижарага олади

Қашқадарё вилояти делегациясининг Беларусга амалга оширган ташрифи доирасида қатор муҳим иқтисодий ва гуманитар келишувларга эришилди. Бу ҳақда “Дунё” ахборот агентлиги хабар берди.

 

Маълум қилинишича, ташриф давомида Ўзбекистон вакиллари Беларуснинг Витебск вилоятида жойлашган Браслав, Шумилин, Постав каби ҳудудлардаги чорвачилик комплекслари ҳамда савдо объектлари фаолияти билан танишган. Шунингдек, Витебск вилояти ижроия қўмитаси раҳбарияти билан ўтказилган учрашувларда иқтисодий ҳамкорликни янада ривожлантириш ва қўшма ишлаб чиқариш занжирларини шакллантириш масалалари муҳокама қилинган.

 

Ташриф доирасида “Асл Юксалиш Савдо” ва “Муборак қоракўлчилик” корхоналари ҳамда Шумилин туманидаги “Сиротинский” чорвачилик фермаси вакиллари билан учрашувлар ўтказилиб, ўзаро манфаатли ҳамкорликни йўлга қўйиш бўйича келишувларга эришилди.

 

Эришилган келишувларга кўра, Ўзбекистон томони Беларус ҳудудида 4 минг гектар экин майдонини узоқ муддатли ижарага олади. Ушбу ер майдонида йирик аграр лойиҳани амалга ошириш режалаштирилган бўлиб, унинг биринчи босқичида 1 минг бош қорамол парваришлаш кўзда тутилган.

 

Шу билан бирга, экспорт йўналишида ҳам сезиларли натижаларга эришилди. Жумладан, “Асл Юксалиш Савдо” корхонаси Беларуснинг йирик савдо тармоқларидан бири — “Доброном” ёпиқ акциядорлик жамияти билан шартнома имзолади.

 

Ушбу шартномага мувофиқ, Ўзбекистондан Беларусга ҳар йили 60 минг тонна қишлоқ хўжалиги маҳсулотлари етказиб берилади. Экспорт таркибига қуруқ мевалар, дуккакли экинлар, полиз маҳсулотлари ҳамда узум киритилади.

 

Иқтисодий ҳамкорлик билан бир қаторда, гуманитар алоқаларни ривожлантиришга ҳам алоҳида эътибор қаратилди. Хусусан, туристик соҳада ҳамкорликни кучайтириш мақсадида икки мамлакат туризм вакиллари учун ўзаро танишув сафарларини ташкил этишга келишиб олинди.

 

Шунингдек, Беларус Касаба уюшмалари федерацияси раҳбари Юрий Сенко билан ўтказилган учрашувда Қашқадарё вилояти театри жамоасининг Минск саҳналарида спектакллар намойиш этиши ташаббуси қўллаб-қувватланди.