Жиззах вилоятида ов пайтида эҳтиётсизлик оқибатида инсон ўлими билан якунланган ҳодиса юз берди. Бу ҳақда Kun.uz хабар берди.
Суд ҳукмида қайд этилишича, Самарқанд вилояти Иштихон туманида яшовчи 31 ёшли фуқаро Ғ.А. 2025 йил 5 октябрь куни уч нафар таниши билан ов қилиш мақсадида Жиззах вилояти Мирзачўл туманига борган. Улар туман ҳудудидаги Гулзор маҳалласига қарашли дала майдонида ёввойи тўнғиз овлашни режалаштирган ва овчилар қамишзор орасида турли жойларга беркинишган.
Ғ.А. беркиниб ўтирган вақтда унинг шериги Ў.М. қамишлар орасидан яқинлашган. Атроф қоронғи бўлгани сабабли Ғ.А. уни ёввойи ҳайвон деб ўйлаб, эҳтиётсизлик билан ов қуролидан бир маротаба ўқ узган. Отилган ўқ Ў.M.нинг бош миясининг орқа қисми чап томонига тегиб, оғир жароҳат етказган.
Жароҳатланган фуқаро зудлик билан шифохонага олиб борилган, бироқ кўрсатилган тиббий ёрдамга қарамай, вафот этган.
Суд жараёнида расмий рўйхатдан ўтган ва икки йилдан буён овчилик билан шуғулланиб келган Ғ.А. айбига иқрор бўлиб, шеригини билмасдан отиб қўйганини билдирган. У ҳодиса вақтида атроф қоронғи бўлганини, марҳум яқин дўсти эканини айтиб, суддан енгиллик сўраган.
Мирзачўл тумани жиноят ишлари бўйича судининг ҳукми билан Ғ.А. Ўзбекистон Республикаси Жиноят кодексининг 102-моддаси 1-қисми (эҳтиётсизлик орқасида одам ўлдириш) билан айбли деб топилди.
Суд ҳукмига кўра, унга 1 йил муддатга ов қилиш ҳуқуқидан маҳрум этиш ҳамда иш ҳақининг 20 фоизини давлат даромади ҳисобига ушлаб қолган ҳолда 1 йил 6 ой ахлоқ тузатиш ишлари жазоси тайинланди.