Украина президенти Владимир Зеленский Россия томонидан уруш ҳаракатларини 2026 йилгача давом эттириш режалари мавжудлиги ҳақида маълум қилди. Бу ҳақда у ўзининг Телеграм каналида эълон қилди.
Зеленскийнинг таъкидлашича, Москванинг келгуси йил ҳам кенг кўламли ҳарбий операцияларни давом эттиришга тайёрланаётгани ҳақида қўшимча сигналлар олинмоқда. Унинг сўзларига кўра, ушбу сигналлар нафақат Украина учун, балки халқаро ҳамжамият, хусусан, Киевнинг ҳамкорлари учун ҳам муҳим аҳамиятга эга.
Украина президенти Россия расмийлари томонидан берилаётган баёнотлар ва юборилаётган сигналлар урушни якунлаш ниятидан далолат бермаслигини, аксинча, ҳарбий ҳаракатларни давом эттиришга қаратилганини қайд этди. Зеленский бу сигналлар Россия армиясининг расмий буйруқлари билан боғлиқ эканини алоҳида таъкидлади.
Шунингдек, у халқаро ҳамкорларни, айниқса АҚШни вазиятни тўғри баҳолашга ва Россиянинг ҳақиқий ниятларига муносиб жавоб чораларини кўришга чақирди.