Toshkent xalqaro kinofestivali yangicha shakl va mazmunda qayta tiklanmoqda
Xabaringiz bor “Ipak yo‘li durdonasi” kinofestivali O‘zbekiston Respublikasi Prezidenti Shavkat Mirziyoyev tashabbusi bilan qayta tiklandi.
“Toshkent xalqaro kinofestivalini qayta tiklash va o‘tkazish to‘g‘risida” Prezident qarori qabul qilindi. Hujjatga muvofiq, shu yilning 28 sentyabridan 3 oktyabrgacha “Ipak yo‘li durdonasi” ХIII Toshkent xalqaro kinofestivali o‘tkazilyapti.
Ushbu kinofestival, avvalo, kino sanʼati vositasida dunyo mamlakatlari o‘rtasida madaniy muloqotni yana-da mustahkamlash, jahon kinoustalari bilan hamkorlikda qo‘shma loyihalarni amalga oshirish, insonparvarlik va bag‘rikenglik, xalqlar do‘stligini targ‘ib qiluvchi, madaniy xilma-xilligini aks ettiruvchi eng sara jahon kinosi durdonalarini targ‘ib qilishda muhim ahamiyat kasb etadi.
Kinofestivalga katta tayyorgarlik ko‘rildi. Bir paytlar xalqlar va millatlar do‘stligiga xizmat qilgan xalqaro anjuman oradan bir necha yil o‘tib, butkul yangicha mazmun va shaklda qayta tiklanmoqda. Kinofestivalga bejiz “Buyuk ipak yo‘li durdonasi”, deb nom berilmagan. Eng muhimi, u yoshlar uchun tajriba almashish maydoniga aylanyapti. Yoshlar kino olamidagi mashhur aktyor va rejissyorlar bilan bevosita muloqotda bo‘lib, tajriba va ko‘nikma oshirish imkoniyatiga ega bo‘ladi. Qolaversa, ushbu festivaldan kutilayotgan asosiy maqsad ham ana shundan iborat.
Nozim Safari, O‘zbekiston Kinematografiya agentligi axborot xizmati maslahatchisi:
— Festivalga qirqqa yaqin mamlakatdan mehmonlar kelishi kutilmoqda. Yaqin qo‘shnilarimiz Qozog‘iston, Tojikiston, Qirg‘iziston, Rossiya, Belarus, Ukraina hamda Yevropa Ittifoqi mamlakatlaridan Polsha, Fransiya, Italiya hamda AQSH sanʼat namoyandalari tashrif buyuradi. Anjumanda Hindiston va Pokiston mamlakatlaridan ham delegatsiyalar ishtirok etish istagini bildirgan. Ular o‘zlarining eng sara filmlarini taqdim etadi. Shu bilan birga, ular o‘zimizning milliy filmlarimizni ham ko‘rib baho beradi. Festival doirasida yirik bitimlar tuzish imkoniyati mavjud. Bularning bari kinofestival yuqori nufuzga egaligidan dalolat beradi.
Feruza Nodirova, O‘zbekiston Kinematografiya agentligi badiiy
kengashi aʼzosi:
— Saralash komissiyasi deyarli bir oydan beri Toshkent xalqaro kinofestivaliga ko‘rikdan tashqari tavsiya etilgan filmlarni saralash bilan shug‘ullanyapti. 140 ta filmdan 89 tasi respublikamiz viloyat kinoteatrlarida namoyish etishga tavsiya etildi. Undan, asosan, Polsha, Belarus, Rossiya, Qirg‘iziston, Qozog‘iston filmlari o‘rin olgan. Bu filmlarning deyarli barchasi festival maqsadiga to‘liq javob beradi. Yaʼni ularda insonparvarlik, ezgulik, mehr-oqibat va do‘stlik kabi g‘oyalar targ‘ib etilgan.
Festivalga kelgan ishtirokchi davlatlar kinoijodkorlari, prodyuserlari va aktyorlari respublikamizning deyarli barcha viloyatidagi kinoteatrlarida ijodiy uchrashuvlar o‘tkazadi va saralangan filmlar taqdimoti bo‘lib o‘tadi. Demak, nafaqat Toshkent, balki respublikamizning barcha hududi aholisi jahon kinematografiyasida ro‘y berayotgan o‘zgarishlar, yangiliklar va yangi filmlar bilan tanishish imkoniyatiga ega bo‘ladi.
Ma'lumot ornida: “Ipak yo‘li durdonasi” XIII Toshkent xalqaro kinofestivalining tantanali ochilish marosimi “Kinochilar uyi”da bo‘lib o‘tadi. Uning ochilish marosimida jahon va milliy kinoning mashhur yulduzlari — 40 ga yaqin mamlakatdan 400 ga yaqin xorijlik kinoijodkorlar ishtirok etadi. Kinofestival doirasida 14 mamlakat kinosi kunlari bo‘lib o‘tadi.
Munojat Valiyeva
