Xitoy COVID-19 statistikasini e’lon qilishni to‘xtatdi
Dekabr boshida mamlakatda karantin cheklovlariga qarshi norozilik namoyishlari bo‘lib o‘tgandi.
Xitoy sog‘liqni saqlash milliy komissiyasi COVID-19 bilan kasallanish holatlari bo‘yicha kunlik statistikani e’lon qilishni to‘xtatdi. Reuters agentligiga ko‘ra, ushbu ma’lumotlar aksariyat hollarda ishonchsiz bo‘lib chiqmoqda.
Komissiya bundan buyon statistika Xitoyning kasalliklar nazorati va profilaktikasi markazi tomonidan e’lon qilinishini ma’lum qilgan.
Dekabr oyida rasmiy Pekin koronavirusga qarshi kurash strategiyasini o‘zgartirganidan keyin mamlakatda kasallanish holatlari keskin ko‘paygan. Shunga qaramay, Xitoy sog‘liqni saqlash milliy komissiyasi so‘nggi to‘rt kunda o‘lim holatlari haqida umuman ma’lumot bermagan. Shuningdek, xitoyliklar COVID-19 bilan bog‘liq o‘limni belgilashi shartlari ham o‘zgardi: endi nafas yetishmovchiligi oqibatida vafot etganlargina koronavirus oqibatida halok bo‘lgan deb tan olinadi.
O‘tgan hafta Britaniyaning Airfinity tadqiqot kompaniyasi Xitoyda kuniga millionga yaqin odam koronavirusga chalinayotgani va 5 ming kishi infeksiya qurboni bo‘layotganini ma’lum qilgandi.
Dekabr boshida ko‘plab hududlarda bo‘lib o‘tgan norozilik namoyishlari oqibatida mamlakatda umumiy PZR-test topshirish tizimi bekor qilingandi. Bundan tashqari, bir provinsiyadan ikkinchisiga o‘tishda ham majburiy PZR talabi bekor qilingan.
