Eron samolyotida kutilmagan nosozlik: g‘ildirak shinasi havoda uzilib ketdi
Samolyot Mashhad aeroportiga favqulodda qo‘ndirildi.
Eronning Sepehran Airlines aviakompaniyasiga tegishli Boeing 737 samolyoti parvoz vaqtida qo‘nish shassisi g‘ildiraklaridan birining shinasidagi bir qismi uzilib ketgani sababli Mashhad aeroportiga favqulodda qo‘ndi. Bu haqda Eronning Rokna axborot agentligi xabar berdi.
Hodisa dushanba kuni Mashhaddan Kermanshoh shahriga uchayotgan samolyotda sodir bo‘lgan. Dastlabki xabarlarda samolyotning qo‘nish shassisi bilan bog‘liq muammo yuzaga kelgani va dvigatelda ham nosozlik kuzatilgani aytilgan.
Keyinchalik aniqlashtirilishicha, parvoz vaqtida qo‘nish shassisi g‘ildiraklaridan birining shinasidagi bir qismi uzilib ketgan.
Shundan so‘ng ekipaj favqulodda qo‘nish so‘ragan va samolyot Mashhad aeroportiga qo‘ndirilgan.
Hodisa oqibatida yo‘lovchilardan hech biri jabrlanmagan. Biroq parvoz vaqtida yuzaga kelgan nosozlik samolyot bortida xavotir va vahimaga sabab bo‘lgani xabar qilingan.
Hodisaning aniq sabablari va samolyotdagi texnik nosozliklar bo‘yicha qo‘shimcha tafsilotlar hozircha maʼlum qilinmagan.
