“Sikada” virusi O‘zbekistonga xavf solmoqdami?

So‘nggi vaqtlarda dunyo bo‘ylab COVID-19’ning “Sikada” (BA.3.2) deb nomlangan yangi shtammi tarqalayotgani haqida xabarlar berilmoqda. Ushbu vaziyatga mutaxassis tomonidan izoh berildi.

 

Ma’lumotlarga ko‘ra, Jahon sog‘liqni saqlash tashkiloti (JST) ushbu mutatsiya hozirga qadar AQSH, Gonkong, Mozambik va Buyuk Britaniya kabi jami 23 ta davlatda qayd etilganini bildirgan.

 

Mazkur holat yuzasidan Sog‘liqni saqlash vazirligi matbuot xizmatiga  Sanitariya-epidemiologik osoyishtalik va jamoat salomatligi qo‘mitasi raisi birinchi o‘rinbosari Nurmat Atabekov izoh berdi.

 

Uning ta’kidlashicha, BA.3.2 shtammi yaqinda aniqlangan emas va u tez tarqalmasligi bilan ajralib turadi. Shu xususiyati sababli unga uzoq vaqt “uyquda” bo‘ladigan hasharot — “sikada” nomi berilgan.

 

Mutaxassisga ko‘ra, JST hozircha ushbu shtamm keng tarqalishi yoki jiddiy asoratlarga olib kelishi mumkinligi bo‘yicha asosli xulosa chiqarmagan. Shuningdek, uning boshqa shtammlarga nisbatan xavfliroq ekaniga oid yetarli dalillar mavjud emas.

 

Dastlabki tahlillar “Sikada” shtammi klinik jihatdan “Omikron” variantiga o‘xshash kechishini ko‘rsatmoqda. U nafas yo‘llari zararlanishi, jumladan burun bitishi, yo‘tal, tomoq og‘rig‘i, qizarish, ayrim hollarda hid va ta’mni sezmaslik kabi alomatlar bilan namoyon bo‘lishi mumkin.

 

Mutaxassisning ta’kidlashicha, ushbu virus kattalarga nisbatan bolalar orasida ko‘proq uchrashi mumkin. Bu, asosan, pandemiya davrida katta yoshdagilarning aksariyati emlangani va ularda immunitet shakllangani bilan izohlanadi. Shu bilan birga, avval koronavirus bilan kasallanmagan bolalarda kasallikka qarshi antitanachalar hali to‘liq shakllanmagan bo‘ladi.

 

Bundan tashqari, surunkali kasalliklarga ega shaxslar, nafas yo‘llari xastaliklari bilan og‘riganlar, immuniteti past va keksa yoshdagilar uchun xavf saqlanib qoladi.

 

Mutaxassislar virus aniqlangan hududlardan qaytgan shaxslar bilan muloqotni cheklashni tavsiya etmoqda. Biroq, ularning fikricha, “Sikada” shtammi epidemiya yoki pandemiyaga sabab bo‘lishi ehtimoli past.

 

Qayd etilishicha, O‘zbekistonda epidemiologik vaziyat barqaror bo‘lib qolmoqda. Aholining qariyb 80 foizida jamoaviy immunitet shakllangani bu borada muhim omil sifatida ko‘rsatilmoqda. 

 

Avvalroq koronavirusning mazkur shtammi bilan kasallanganlar AQSH, Buyuk Britaniya, Gonkong va Mozambikda qayd etilgani haqida xabar berilgandi.