Oshqozon kichraytirish amaliyoti qachon tavsiya etiladi?
Bu bo‘yicha mutaxassis maʼlumot berdi.
Keyingi bir necha o‘n yillikda kam harakatlik va noto‘g‘ri ovqatlanish sababli ortiqcha vazn va semizlik butun dunyoda jiddiy muammoga aylandi.
JSST maʼlumotlariga ko‘ra, 2030-yilga borib, Yer yuzi aholisining qariyb 45 foizi semirib ketishi mumkin. Eng yomoni, bu kasallik nafaqat kattalar, balki yoshlar orasida ham keng tarqalmoqda.
Shu bois so‘nggi vaqtlarda oshqozon qisqartirish amaliyoti orqali semizlikdan qutulish tobora ommalashib boryapti. Xo‘sh, ushbu jarrohlik operatsiyasi qanchalik xavfsiz? U qanday hollarda tavsiya etiladi?
Shu kabi savollarga akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi direktori o‘rinbosari Shuhrat Hoshimov javob berdi.
“Semizlikka chalingan bemorlarning ko‘pchiligi bugun parhez tutish, sport bilan shug‘ullanish kabi tabiiy ozish usullaridan ko‘ra tezroq natijaga erishish va muammodan qisqa muddatda xalos bo‘lishni maʼqul ko‘rmoqda”, — deydi mutaxassis.
Qolaversa, aksariyat odamlar ortiqcha vaznga qarshi uzoq vaqt kurashgan, biroq foydasi bo‘lmagan. Shu bois ular operatsiya yo‘li bilan ozishga rozi.
Albatta, jahon tibbiyoti uchun bariatriya, yaʼni oshqozon, ichak yoki ikkalasini birga xirurgik o‘zgartirish amaliyoti yangilik emas.
Yurtimizda ham bunday operatsiyalarni o‘tkazuvchi mutaxassislar paydo bo‘lgach, ko‘pchilik bemorlarda mazkur muolaja orqali semizlikdan xalos bo‘lish istagi paydo bo‘ldi.
Oshqozonning kattaligi semizlikka asosiy sababmi?
Ortiqcha vaznning yuzaga kelishiga bir necha omillar sabab bo‘ladi. Yaʼni kamharakatlik, turli zararli odatlar, qandli diabet, depressiya, stress, psixonevrologik o‘zgarishlar oqibatida ko‘pincha insonda semirish kuzatiladi.
Shuningdek, gormonal o‘zgarishlar va gormon dorilarni qabul qilish ham bunga sabab bo‘lishi mumkin.
Meʼdani kichraytirish amaliyoti qanday hollarda tavsiya etiladi?
Tibbiyotda semizlik turli darajalarga bo‘linadi. Tana vazni indeksi 30 dan 35 gacha bo‘lsa, birinchi, 35-40 gacha ikkinchi, 40 dan tepasi uchinchi darajali hisoblanadi. 40 dan yuqori bo‘lganda 16-60 yosh oralig‘idagi bemorlarga jarrohlik yo‘li bilan ozish tavsiya qilinadi.
Shuningdek, tana indeksi 35 dan yuqori va qandli diabet, gipertoniya, osteoxondroz, qonda lipidlar miqdorining balandligi, yurak ishemik hamda artroz kabi yondosh xastaliklar bo‘lganda ham mazkur amaliyotni o‘tkazish mumkin.
Bundan tashqari, ozishga tabiiy choralar foyda bermaganda ham bu muolaja usuliga murojaat qilinadi. Bariatrik jarrohlikdan so‘ng bemorlar sezilarli va tez vazn yo‘qotadi.
