Endilikda qayerga qanday daraxt ekishni Respublika shtabi belgilaydi
Respublikada 25 oktyabrdan “kuzgi daraxt ekish mavsumi” eʼlon qilinadi.
Endilikda qayerga qanday daraxt ekishni Respublika shtabi belgilab beradi. Bu haqda Prezident boshchiligidagi yig‘ilishda maʼlum qilindi.
Qayd etilishicha, yig‘ilish kun tartibidagi ikkinchi masala sifatida “Yashil makon” umummilliy loyihasining amalga oshirilishi ko‘rib chiqildi.
Ushbu loyiha boshlanganidan o‘tgan 2 yilda uy-joy massivlarida 1 ming 200 gektardan ortiq yashil bog‘ va jamoat parklari, 1 million gektardan ziyod yashil hudud va qoplamalar barpo etildi.
Joriy yilda 25 oktyabrdan 1 dekabrgacha “kuzgi daraxt ekish mavsumi” eʼlon qilinadi, uning doirasida 85 million tup ko‘chat ekish rejalashtirilgan.
Bunda barcha darajadagi rahbarlar, vazirlar, hokimlar, mahalla faollari, jamoat arboblari, nuroniylar, sanʼatkor va sportchilar, mashhur blogerlar o‘rnak ko‘rsatishlari muhimligi taʼkidlandi.
Buning uchun Respublika shtabi tashkil qilinadi. Fanlar akademiyasi, Tuproqshunoslik, O‘rmonchilik institutlari, o‘rmon xo‘jaliklari rahbarlari ham shtabga aʼzo bo‘ladi. Shtab tuproq tahlili, iqlim sharoiti asosida qayerga, qachon, qaysi ko‘chat turini qancha ekishni belgilab beradi.
