Homiladorlik va kasallik nafaqalari “Baraka” ijtimoiy kartasiga o‘tkaziladi
Nafaqa olish uchun bankka borish, alohida hisob ochish yoki qo‘shimcha ariza topshirish talab etilmaydi.
O‘zbekistonda davlat ijtimoiy sug‘urtasi doirasidagi ayrim nafaqalarni tayinlash va to‘lashning yangi tartibi joriy etildi. Bu haqda Iqtisodiyot va moliya vazirligi xabar berdi.
Yangi tartibga ko‘ra, homiladorlik va tug‘ish hamda vaqtincha mehnatga layoqatsizlik (kasallik) nafaqalari tayinlangach, tegishli mablag‘lar fuqaroning “Baraka” ijtimoiy kartasiga to‘g‘ridan to‘g‘ri o‘tkaziladi.
Agar fuqaroning “Baraka” ijtimoiy kartasi mavjud bo‘lsa, nafaqa mablag‘lari qo‘shimcha ariza yoki murojaatlarsiz avtomatik ravishda kartaga o‘tkaziladi. Bunda bankka borish, alohida hisob raqami ochish yoki qo‘shimcha hujjatlar taqdim etish talab etilmaydi.
“Baraka” kartasi mavjud bo‘lmagan fuqarolar uchun esa nafaqa tayinlangach, “Baraka” mobil ilovasi orqali virtual ijtimoiy karta avtomatik ravishda ochiladi. Tayinlangan mablag‘lar ushbu virtual kartaga o‘tkaziladi.
Fuqaro “Baraka” mobil ilovasi orqali ijtimoiy karta va unga kelib tushgan nafaqa mablag‘lari haqidagi ma’lumotlarni kuzatib borishi mumkin.
Shuningdek, jismoniy plastik karta zarur bo‘lgan taqdirda, uni mobil ilova orqali buyurtma qilish mumkin. Kasallik nafaqasi tayinlangan fuqarolarga “Baraka” ijtimoiy kartasi bepul rasmiylashtiriladi.
Yangi tartib nafaqa olish jarayonini soddalashtirish, ortiqcha murojaat va hujjatbozliklarning oldini olish hamda ijtimoiy sug‘urta xizmatlarini raqamlashtirishga qaratilgan.
Fuqarolarga nafaqa tayinlanganidan so‘ng “Baraka” mobil ilovasini tekshirib, karta va to‘lovlar haqidagi ma’lumotlarni kuzatib borish tavsiya etiladi.
