6 yil tutqunlikda ushlab turilgan fuqaro O‘zbekistonga qaytarildi
Ta’kidlanishicha, Andijon viloyatining Izboskan tumanida yashovchi A.A.ni qo‘shni ayol Qozog‘istonning Chimkent viloyatiga chaqirib, aldov yo‘li bilan sotib yuboradi.
Qozog‘istonda bedarak yo‘qolgan yurtdoshimiz qidirib topildi va O‘zbekistonga qaytarildi.
Mamlakatimizning Olmaota shahridagi Bosh konsulligi ushbu holat bo‘yicha O‘zbekiston Kambag‘allikni qisqartirish va bandlik vazirligi huzuridagi Tashqi mehnat migratsiyasi agentligining Chimkent shahridagi vakili, "Sana Sizem" nodavlat notijorat tashkiloti (NNT) va Turkiston viloyati polisiya departamentining Uyushgan jinoyatchilikka qarshi kurashish bo‘limi bilan hamkorlikda fuqaro A.A. qidiruvga berilgan edi.
Shu yil 11-sentabr kuni yurtdoshimizni Turkiston viloyatining Ordabasi tumani polisiyasi ko‘magida izlab topishga muvaffaq bo‘lindi.
Mamlakatimiz fuqarosining huquq va manfaatlarini himoya qilish maqsadida u "Sana sizem" NNT tomonidan yotoq-joy va oziq-ovqat bilan ta’minlandi.
Shuningdek, A.A.ning arizasi nazoratga olinishi yuzasidan Bosh konsullik tomonidan Qozog‘istonning tegishli tashkilotlariga murojaat qilindi.
So‘ngra yurtdoshimizga Bosh konsullik vatanga qaytish guvohnomasini berdi hamda "Sana Sizem" NNT xodimi bilan hamrohlikda u "Jibek-joli - Gʻisht ko‘prik" chegara o‘tkazish punkti orqali mamlakatimizga qaytarildi.
