Fargʻonada psixotrop tabletka sotayotgan dorixona xodimi ushlandi
Hozirda unga nisbatan jinoiy ish ochilgan.
Samarqand va Fargʻona viloyatlarida kuchli taʼsir qiluvchi dori vositalarini sotayotgan shaxslar ushlandi.
Bosh prokuratura huzuridagi Departament hamda DXXning Samarqand viloyati boshqarmalari tomonidan IIB xodimlari bilan hamkorlikda Samarqand shahri, Beruniy koʻchasida oʻtkazilgan tezkor tadbirda fuqarolar S.SH. va I.M. fuqaro G.K.ga 1 000 dona “Zardeks” nomli kuchli taʼsir qiluvchi dori vositasini 18 mln soʻmga sotgan vaqtlarida ashyoviy dalillar bilan ushlangan.
Shuningdek, Departamentning Furqat tuman boʻlimi tomonidan oʻtkazilgan tezkor tadbirda “K.H.” MCHJ dorixonasi sotuvchisi M.M. fuqaro D.M.ga 61 dona “Zardeks” nomli kuchli taʼsir qiluvchi dori vositasini sotgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 251-1-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qoʻzgʻatilib, tergov harakatlari oʻtkazilmoqda.
