Toshkentda odamlar liftda 9-qavatdan tushib ketdi
Holat boʻyicha rasmiylar maʼlumot berdi.
Toshkent shahrining Mirzo Ulugʻbek tumanidagi binolardan birida ichida odamlar boʻlgan lift 9-qavatdan qulab tushgani aytilgan xabar tarqaldi. Holatga tuman hokimligi munosabat bildirdi.
Aniqlanishicha, 24-oktyabr kuni 253-uyning 2 yoʻlagida oʻrnatilgan lift qurilmasidan ushbu uyda yashovchi fuqarolar foydalanish davrida liftga belgilangan tartibda texnik xizmat koʻrsatilmagani sababli shaxta kabinasi eshiklari konaktlari boʻshab qolgan. Tashqaridan qoʻl yordamida ochilishi natijasida lift shaxta eshigi xavfsizlik moslamasi ishga tushgan, natijada lift darhol toʻxtab qolgan.
"Oʻrganish davomida lift tushib ketmagani, aksincha tegishli xavfsizlik qurilmasi ishga tushib darhol toʻxtagani aniqlandi. Hozirda maxsus tashkilot tomonidan barcha kamchiliklar bartaraf etilmoqda. Lift takroran sinovdan oʻtkazilmoqda. Sodir boʻlgan holat boʻyicha jabrlanganlar mavjud emas", deyiladi xabarda.
