Qozog‘istonda YTHda halok bo‘lgan o‘zbekistonliklarning jasadlari Vatanga olib kelindi
Olmaota shahridagi Bosh konsulxonasi Migratsiya agentligi bilan hamkorlikda zarur choralarni ko‘rdi.
22 avgust kuni Qozog‘istonning Qizilo‘rda viloyatidan o‘tuvchi Shymkent–Samara avtomobil yo‘lining Aqsay hududida O‘zbekiston fuqarolari ishtirokida yo‘l-transport hodisasi sodir bo‘lgan edi.
Hodisa oqibatida uch nafar O‘zbekiston fuqarosi voqea joyida halok bo‘lgan. Mahalliy huquqni muhofaza qiluvchi idoralarning dastlabki ma’lumotlariga ko‘ra, YTH haydovchining rul boshqaruvida uxlab qolishi oqibatida yuk avtomobili bilan to‘qnashib ketishi sababli yuz bergan bo‘lishi mumkin.
“Dunyo” AA xabariga ko‘ra, O‘zbekistonning Olmaota shahridagi Bosh konsulxonasi Migratsiya agentligi bilan hamkorlikda halok bo‘lgan fuqarolarning jasadlarini Vatanga tezkor qaytarish bo‘yicha zarur choralarni ko‘rdi.
Qozog‘istonning vakolatli idoralari bilan hamkorlikda zarur hujjatlar rasmiylashtirilib, uch nafar marhumning jasadlari doimiy yashash joyi — Toshkent viloyatining Bekobod shahriga yetkazildi.
