Toshkentdagi ayrim tashkilotlarda ish vaqtini 8:00 dan boshlash taklif qilinmoqda
Taklifga ko‘ra, ish kunining umumiy davomiyligi o‘zgarmaydi. Xodimlar ishni bir soat ertaroq boshlaydi va shunga mos ravishda bir soat ertaroq yakunlaydi.
Toshkent shahar hokimligi shahar va tuman hokimliklari, shahar boshqarmalari hamda ularga qarashli bo‘linmalarda ish vaqtini soat 8:00 dan 17:00 gacha belgilashni taklif qilmoqda.
Taklifga ko‘ra, ish kunining umumiy davomiyligi o‘zgarmaydi. Xodimlar ishni bir soat ertaroq boshlaydi va shunga mos ravishda bir soat ertaroq yakunlaydi.
Hokimlik ma’lumotiga ko‘ra, hozirda ko‘plab ijtimoiy muassasalar, ayrim davlat tashkilotlari hamda korxona va tashkilotlarda ish kuni soat 8:00 da boshlanadi. Shu sababli shahar hokimligi va unga qarashli xizmatlarning ham fuqarolarga shu vaqtdan boshlab xizmat ko‘rsatishga tayyor bo‘lishi taklif qilinmoqda.
Qayd etilishicha, ish jadvallarini uyg‘unlashtirish bir nechta idora ishtirokini talab qiladigan masalalarni tezroq muvofiqlashtirishga yordam beradi.
Shuningdek, Yo‘l harakatini tashkil etish markazi tomonidan o‘tkazilgan transport oqimlari tahlili va modellashtirish natijalariga ko‘ra, tashkilotlarda ish boshlanish vaqtlarini taqsimlash ertalabki tig‘iz paytlarda yo‘l tarmog‘iga tushadigan yuklamani kamaytirishi mumkin.
Yangi ish grafigi joriy etilgan taqdirda, tushlik vaqti ham unga mos ravishda tashkil etilib, kun davomida transport oqimlari va umumiy ovqatlanish obyektlariga tushadigan yuklamani bir maromda taqsimlash ko‘zda tutilmoqda.
Yakuniy qaror qabul qilinishidan oldin Toshkent aholisi o‘rtasida so‘rovnoma o‘tkazilmoqda. Taklif aholi tomonidan qo‘llab-quvvatlansa, u belgilangan tartibda kasaba uyushmalari tashkilotlari bilan kelishish uchun kiritiladi.
So‘rovnoma natijalari 28-avgust kuni sarhisob qilinadi.
