Samarqandda 1000 dona psixotrop dori vositasini sotayotganlar ushlandi
Ular dorilarni 18 mln so‘mga pullayotgan vaqtida qo‘lga olingan.
Bosh prokuraturaning xabar berishicha, Samarqand shahri Beruniy ko‘chasi hamda Farg‘ona viloyati Furqat tumanida "Zardeks" nomli kuchli ta’sir qiluvchi dori vositasini sotayotgan shaxslar ushlangan.
Unga ko‘ra, Bosh prokuratura huzuridagi Departament hamda DXX va IIB xodimlari bilan hamkorlikda Samarqand shahri, Beruniy ko‘chasida tezkor tadbir o‘tkazilgan.
Tadbirda fuqarolar S.Sh. va I.M. fuqaro G.K.ga 1000 dona "Zardeks" nomli kuchli ta’sir qiluvchi dori vositasini 18 mln so‘mga sotgan vaqtida ashyoviy dalillar bilan ushlangan.
Shuningdek, Departamentning Farg‘ona viloyati Furqat tuman bo‘limi tomonidan o‘tkazilgan tezkor tadbirda “K.H.” MCHJ dorixonasi sotuvchisi M.M. fuqaro D.M.ga 61 dona Zardeks nomli kuchli ta’sir qiluvchi dori vositasini sotgan vaqtida ashyoviy dalillar bilan qo‘lga tushgan.
Mazkur holatlar yuzasidan Jinoyat kodeksining 251-1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
