Deputat Toshkentda avtobuslarni bepul qilish taklifi bilan chiqdi
Uning fikricha, buning natijasida ”probka”lar kamayadi va yo‘l harakati tartibga keladi.
Deputat Doniyor G‘aniyev Toshkentda jamoat avtobuslarini bepul qilish taklifi bilan chiqdi.
Unga ko‘ra, avtobuslarni hammaga bepul qilish mumkin. Bu byudjetga qo‘shimcha 300 mlrd so‘mga tushadi. Ammo buni qoplashning ham o‘z manbasi bor.
”Hozirgi hisob-kitobda shahar hokimiyatiga yiliga qo‘shimcha 300 mlrd so‘mga tusharkan. Bu pullarni shahar markaziy qismiga kiradigan moshinalarga kunlik soliq solish orqali qoplasa bo‘ladi”, – deydi deputat.
Agar poytaxt markazida harakatlanuvchi avtomobillarga bir kun uchun 1 AQSH dollari miqdorida soliq solinsa va shahardagi bir kunlik 500 mingta mashinadan 20 foizi, yaʼni 100 mingi shahar markazida harakatlanadi deb olinsa, kuniga 100 ming AQSH dollarni tashkil qiladi.
”Bu odamlarda avtobusdan ko‘proq foydalanishga, moshinadan kamroq foydalanishga rag‘bat bo‘ladi. ”Probka”lar kamayadi, yo‘l harakati sal tartibga keladi”, – deb yozadi deputat.
