“Navoiy issiqlik elektr stansiyasi”da yangi tariflar joriy etildi
“Navoiyazot” AJ uchun 1 kVt·soat elektr energiyasi narxi QQS bilan birgalikda 676 so‘m miqdorida tasdiqlandi.
O‘zbekiston Respublikasi Vazirlar Mahkamasi huzuridagi idoralararo tarif komissiyasining 2023-yil 27-oktabrdagi 18-sonli bayonnomasi asosida “Navoiy issiqlik elektr stansiyalari” aksiyadorlik jamiyatida ishlab chiqariladigan elektr va issiqlik energiyasi uchun yangi tariflar belgilandi.
Mazkur qarorga muvofiq, ishlab chiqarish tariflari quyidagicha tasdiqlandi:
- “O‘zbekiston milliy elektr tarmoqlari” AJ uchun 1 kVt·soat elektr energiyasi qiymati 2023-yil 31-dekabrgacha qo‘shilgan qiymat solig‘i (QQS) bilan birgalikda 537 so‘m, 2024-yil 1-yanvardan esa 557 so‘m etib belgilandi.
- “Navoiyazot” AJ uchun 1 kVt·soat elektr energiyasi narxi QQS bilan birgalikda 676 so‘m miqdorida tasdiqlandi.
- Issiqlik energiyasi uchun 1 Gkal narxi QQS hisobga olingan holda 315 000 so‘m etib belgilandi.
Yangi tariflar mamlakat energetika tizimida iqtisodiy samaradorlikni oshirish, ishlab chiqarish xarajatlarini muvozanatlashtirish hamda energiya ta’minoti barqarorligini ta’minlashga xizmat qiladi.
