O‘zbekistonda ichimlik suvi taʼminoti xususiylashtiriladi
Bu bo‘yicha Prezident qarori qabul qilindi.
“Ichimlik suv taʼminoti va oqova suv tizimini yana-da takomillashtirish bo‘yicha qo‘shimcha chora-tadbirlar to‘g‘risida”gi Prezident qarori qabul qilindi
Qarorga ko‘ra, “O‘zsuvtaʼminot” AJ va uning tarkibidagi korxonalar negizida 2024 yil 1 aprelgacha alohida yo‘nalishlar bo‘yicha quyidagi aksiyadorlik jamiyatlari tashkil etiladi:
➖hududiy magistral suv taʼminoti tashkilotlari;
➖Qoraqalpog‘iston Respublikasi, viloyatlar va Toshkent shahrida hududiy ichimlik suv taʼminoti tashkilotlari.
2024 yil 1 yanvardan ichimlik suv va oqova suvni chiqarib yuborish narxlari mahsulot tannarxiga kiritilgan xarajatlar, tizimni rivojlantirish, moliyaviy xarajatlar, soliqlar va majburiy to‘lovlardan kelib chiqib shakllantiriladi.
Yangi quriladigan ichimlik va oqova suv yo‘nalishidagi obyektlar va tizimlarni loyihalashtirishda mazkur hududning to‘liq qamrov darajasini inobatga olish talabi o‘rnatiladi.
Qarorga ko‘ra, 2024–2026 yillarda:
➖ichimlik suv taʼminoti og‘ir bo‘lgan jami 813 ta mahalla ichimlik suv bilan taʼminlanadi;
➖124 693 ta xonadonga ichimlik suv tarmoqlari uy xo‘jaligigacha yetkaziladi;
➖130 ta aholi yashash punktlarida davlat ijtimoiy buyurtmalarini berish orqali ichimlik suv taʼminoti yo‘lga qo‘yiladi;
➖792 090 nafar isteʼmolchilar ichimlik suv uchun hisoblagichlar bilan taʼminlanadi.
2024 yil 1 iyuldan tajriba tariqasida Kogon, Shirin, Yangiyer, Bekobod va Yangiyo‘l shaharlarida ichimlik va oqova suv taʼminoti davlat-xususiy sheriklik asosida xususiy sektorga beriladi.
