Bitmay to‘kilayotgan binolar: Toshkent viloyatidagi 150 ta obyektda ishlar sifatsiz bajarilgan
Bundan tashqari, 106 ta obyektda 4,8 milliard so‘mlik qo‘shib yozish holatlari fosh etilgan.
Toshkent viloyati prokuraturasi organlari huzurida tuzilgan hududiy shtablar tomonidan qurilish ishlari sifati va hajmlarining haqqoniyligi o‘rganilib, 150 ta obyektda sifatsiz bajarilgan 10,6 milliard so‘mlik ishlar aniqlangan. Bundan tashqari, 106 ta obyektda 4,8 milliard so‘mlik qo‘shib yozish holatlari fosh etilgan.
Bu haqda Senatning Sud-huquq masalalari va korrupsiyaga qarshi kurashish qo‘mitasi hamda Senatning prokuratura organlari faoliyati ustidan nazorat qiluvchi komissiyasi yig‘ilishida maʼlum qilindi.
Nazorat tadbirlari davomida prokuratura organlari tomonidan 21,9 milliard so‘mlik 19 ta jinoyat ishi qo‘zg‘atilib, 14,4 milliard so‘m miqdoridagi zarar qoplangan.
Viloyatdagi har bir obyektning loyiha-smeta hujjati qayta o‘rganilishi natijasida 994 ta loyihadan 216,8 milliard so‘m miqdoridagi mablag‘ byudjetdan ortiqcha xarajat qilinishining oldi olingan.
Avvalroq Olmaliqda zilzila talablariga javob bermaydigan “dom” qurilishi to‘xtatilgandi. Shuningdek, bir muddat oldin Chirchiq shahridagi «Yangi O‘zbekiston» massivida qurib topshirilganiga ko‘p bo‘lmagan ko‘p qavatli uyning bir tomonga qiyshayib, “yonboshlab” qolgani kuzatilgan, qurilish vazirligi o‘n kun muddatda muammo bartaraf etilishini vaʼda qilgan edi.
