Bir necha hududlarda animatsion maktablar ochiladi

 

Butunjahon jamiyatining "O‘zbekiston madaniy merosi — yangi renessans asosi" Vll xalqaro kongressi doirasida “Kino olami va media: merosga yangicha nigoh” konferensiyasi bo‘lib o‘tdi.  Kino bo‘yicha alohida anjuman o‘tkazilishi bejiz emas: joriy yil 11 oktyabr kuni O‘zbekiston Prezidenti Shavkat Mirziyoyev raisligida o‘tkazilgan videoselektor yig‘ilishida O‘zbekiston tarixi va madaniyatiga oid badiiy va hujjatli filmlar yaratish vazifasi qo‘yilgan edi. Bu esa o‘z navbatida madaniy merosimiz bilan chambarchas bog‘liq hoda yangi media loyihalarni yaratishni taqozo etadi.

 

Nufuzli anjumanda O‘zbekiston tarixi va tarixiy shaxslari haqida filmlar yaratish uchun TURKSOY mamlakatlari kino tashkilotlarining ijodiy va ishlab chiqarish imkoniyatlarini birlashtirishning yangi mexanizmlari tahlil qilindi.

 

Ozarbayjon, Qozog‘iston, Qirg‘iziston, Turkmaniston, Turkiya va O‘zbekiston kino tashkilotlari rahbarlari ishtirokida turkiy dunyo mamlakatlari o‘rtasida kelgusida hamkorlikdagi filmlarni ishlab chiqarish mavzulari muhokama qilindi.

 

Shuningdek, ushbu mamlakatlarning kino tashkilotlari rahbarlarining Kongress ishida ishtirok etishi, ularning madaniy merosini ommalashtirishga doir yangi kinoloyihalarni taqdim etish borasida TURKSOY davlatlari kinochilar ittifoqini yaratishga oid kelishuv memorandumi imzolandi. Kelishuvga binoan kelgusida Toshkent, Nukus va Buxoro shaharlarida animatsion maktablar ochiladi.