Sizning shijoatingiz dunyoni yanada yaxshilashi shubhasiz — Ziroat Mirziyoyeva
O‘zbekiston birinchi xonimi Toshkentda o‘tgan forumda yosh ekofaollarga murojaat qilib, ularning barqaror muhit uchun kurashdagi yetakchiligini eʼtirof etdi.
9-noyabr kuni Toshkent shahrida Butunjahon bolalar kuni hamda BMTning Iqlim o‘zgarishi bo‘yicha 2023-yilgi konferensiyasi munosabati bilan “Bolalar va yoshlar harakatda — Markaziy Osiyoda iqlim o‘zgarishi” xalqaro forumi bo‘lib o‘tdi.
Forum ochilishida “Zamin” fondi Vasiylik kengashi raisi Ziroat Mirziyoyeva yosh ekofaollarga murojaat qilib, bolalarni iqlim kun tartibiga jalb qilish bo‘yicha mintaqaviy strategiyalar imzolanishini maʼlum qildi.
“Forumning bosh ishtirokchilari — sizlar. Bugun bu yerda sizlarning toza, sog‘lom va barqaror muhit uchun kurashdagi yetakchiligingizni eʼtirof etish maqsadida yig‘ildik. Qo‘shnilarimiz bilan birgalikda Samarqand ekologik oromgohi yakunlari bo‘yicha ishlab chiqilgan Barqaror rivojlanish madaniyatini ilgari surish hamda yoshlar va bolalarni iqlim kun tartibiga jalb qilish bo‘yicha mintaqaviy strategiyaning imzolanishi yangi kelajak sari tashlangan muhim qadam bo‘ladi”.
O‘zbekiston Birinchi Xonimi, shuningdek, yoshlardagi bugungi shijoat va g‘ayrat dunyoni yaxshilashga yordam berishini taʼkidlab o‘tdi.
“Mamlakatlarimizning qadrli yoshlari va o‘smirlariga murojaat qilib aytmoqchimanki, sizning shijoatingiz, qatʼiyatingiz, yangicha tafakkur va yondashuvlaringiz dunyoni yanada yaxshilashga yordam berishi shubhasiz. Sizning ovozingiz yetib borishi va hisobga olinishi uchun bor kuch va saʼy-harakatimizni ishga solamiz”, — deydi Ziroat Mirziyoyeva.
Forumda ishtirok etgan Shahnoza Mirziyoyeva ham iqlim o‘zgarishining salbiy oqibatlariga qarshi kurashishda bolalar va yoshlarning roli ortib borayotganini alohida qayd etdi.
“Yoshlikdan ekologik taʼlim va tarbiya berish, ekologik madaniyatni shakllantirish muhimligi masalasi shu darajada ko‘tarilganidan xursandman. Birinchi marta ekologik ko‘ngillilik va iqlim o‘zgarishi masalalari bo‘yicha siyosat va dasturlarni ishlab chiqishga yoshlarni jalb qilish haqidagi g‘oyalar yuqori maydonlardan aytildi.
Ishonchim komilki, saʼy-harakatlarni birlashtirish bolalar va yoshlarni barqaror rivojlanishni taʼminlashdagi kelajakdagi roliga tayyorlashga yordam beradi”, — deya fikr bildirgan Shahnoza Mirziyoyeva.
