"Mamlakatimizda hech qanday chegara bilmaydigan bilimli avlod yetishib chiqadi"
Saida Mirziyoyeva xorijiy davlatlardan taklif etilgan pedagoglar bilan uchrashdi.
O‘zbekiston Prezidenti yordamchisi Saida Mirziyoyeva xorijiy davlatlardan taklif etilgan pedagoglar bilan uchrashdi. Bu haqda u o‘zining rasmiy telegram-kanalida maʼlum qildi.
"Ilmli, o‘ziga ishongan, munosib avlodni tarbiyalashni maqsad qilgan ekanmiz, bizga ikkita narsa: ona tilimizga muhabbat va xorijiy tillarni puxta o‘rganish kerak.
Chet tilini bilish – dunyo sarhadlari, global axborot eshiklarini ochish, yangi bilimlarni egallash kalitidir.
Bugun xorijiy mamlakatlardan taklif etilgan pedagoglar bilan uchrashib, hamkorlik bo‘yicha yo‘l xaritasini ishlab chiqdik. Bu ingliz, nemis, fransuz va boshqa tillarni o‘rgatuvchi besh yuzdan ziyod malakali o‘qituvchilar demakdir.
Bolalarimiz eng yaxshi ustozlardan saboq olish, o‘qituvchilarimiz zarur mahorat darslarida o‘z bilimini oshirish imkoniga ega bo‘ladilar, mamlakatimizda esa hech qanday chegara bilmaydigan bilimli avlod yetishib chiqadi", - deydi Mirziyoyeva.
