"Olimpiya shaharchasi — ommaviy sportdan professional sportga o‘tish ko‘prigi"
Prezident Olimpiya shaharchasi qurilishi bilan tanishdi.
Maʼlumki, 2025 yilda Yoshlar o‘rtasidagi Osiyo va Paraosiyo o‘yinlari yurtimizda o‘tkaziladi. Shu bois Olimpiya shaharchasida mazkur musobaqalar dasturiga kiritilgan barcha sport turlari uchun sharoit bo‘ladi. Uning maydoni 100 gektar. Asosiy inshootlar — 10 ming o‘rinli stadion va 2 mingdan tomoshabinga mo‘ljallangan velodrom, suv sporti saroyi, yakkakurashlar va jamoaviy o‘yinlar majmualaridir.
Shuningdek, 4 qavatli maʼmuriy bino, 15 ta ochiq sport maydoni, yugurish yo‘laklari, bog‘lar barpo etiladi. Umuman, shaharchaning 54 foiz maydoni yashil hudud bo‘ladi. Buning uchun 37 gektarda sunʼiy ko‘llar tashkil qilinadi.
Loyiha 70 ta mamlakatda sport inshootlari qurgan Xitoyning “CAMC Engineering” kompaniyasi bilan birgalikda amalga oshirilmoqda.
Bundan bir yil oldin, 9 noyabr kuni davlatimiz rahbari mazkur shaharcha qurilishiga tamal toshi qo‘ygan edi. Bugungi kunda asosiy binolarning poydevor ishlari to‘liq bajarilgan. 5 ta majmuaning konstruksiyalari tiklanib, qad ko‘tarib qolgan. Qurilishga mingga yaqin ishchi va muhandislar, maxsus texnikalar jalb qilingan.
Davlatimiz rahbari shaharchani ekspluatatsiya qilish bo‘yicha xorijiy tajribani joriy etish, xavfsizlik choralarini ko‘rish va qulayliklarni oshirish yuzasidan ko‘rsatmalar berdi.
Osiyo o‘yinlari o‘tgandan keyin majmualar bo‘shab qolishi kerak emas, xalqimizga xizmat qilishi kerak. Bu yerda mashg‘ulotlar bilan birga sport taʼlimi, ilmi, tibbiyoti mujassam bo‘lishi zarur. Yaʼni, bu joy mamlakatimiz sportining ilmiy, amaliy, o‘quv-mashg‘ulot markazi bo‘ladi, — dedi Shavkat Mirziyoyev.
Keyinchalik bu yerda Yoshlar siyosati va sport vazirligi, sport federatsiyalari, O‘zbekiston davlat sport akademiyasi va boshqalar faoliyat ko‘rsata boshlaydi. Maydonchalarda yurtdoshlarimiz ham sport bilan shug‘ullanishi mumkin bo‘ladi.
Kelajakda bu shaharcha bilan bolalar sport maktablarini ham bog‘lash kerak. Ommaviy sportdan professional sportga o‘tish ko‘prigi bu, — dedi Prezident.
Shaharchada paralimpiya o‘yinlari ham o‘tkazilgani bois jismoniy imkoniyati cheklangan insonlar uchun qulay yo‘llar va alohida sektorlar tashkil etiladi.
Prezidentimiz tavsiyasiga muvofiq, majmuada qayta tiklanuvchi energiyadan ham foydalaniladi. Yillik quvvati 10 megavatt 56 ming kvadrat metr quyosh panellari o‘rnatiladi.
Shu yerda Toshkent shahri bo‘yicha o‘tgan yili taqdimot qilingan investitsiya dasturiga muvofiq, bu yil ishga tushirilgan loyihalar haqida axborot berildi. Qayd etilganidek, joriy yilning o‘tgan davrida ishlab chiqarish va xizmat ko‘rsatish sohalarida 360 ta loyiha bajarilib, jami 20 mingta ish o‘rni yaratilgan. Shuningdek, kelgusida Yangi hayot tumanida 650 gektar maydonda yangi avlod sanoat zonasi tashkil etish rejalashtirilgan.
