Xivada bolalar dars payti ariq qazishga majburlangani aytilmoqda
Rasmiylar holat yuzasidan munosabat bildirdi.
Ijtimoiy tarmoqlarda Xorazm viloyati Xiva tumanida maktab bolalari dars paytida majburiy mehnatga jalb qilingani aytilgan videoxabar tarqaldi.
Tarqalgan videolavhada Xiva tumanidagi 5-son maktabning 11-sinf o‘quvchilari dars paytida ariq qaziyotgani keltirilgan.
Mazkur holat Xorazm viloyati maktabgacha va maktab taʼlimi boshqarmasi mutaxassislari hamda Xiva tumani Kambag‘allikni qisqartirish va bandlikka ko‘maklashishi bo‘limi Davlat mehnat huquq inspektori ishtirokida o‘rganilgan.
Videolavhadagi holat joriy yil 20 oktyabr kuni Xiva tumanidagi 5-son umumiy o‘rta taʼlim maktabi tashqarisida sodir qilingan bo‘lib, o‘quvchilar bilan suhbatlashilganda ular maktabning chaqiriqqa qadar boshlang‘ich taʼlim rahbariga o‘z ixtiyorlari bilan yordamlashganliklarini, ularni hech kim mehnat qilishga majburlamaganini bildirgan.
"O‘rganish xulosasiga ko‘ra, Xiva tumani 5-son maktab o‘quvchilarining majburiy mehnatga jalb qilinganligi holati o‘z tasdig‘ini topmaganligini maʼlum qilamiz", deyiladi rasmiy munosabatda.
