Manfaatlar to‘qnashuviga yo‘l qo‘yganlik uchun javobgarlik kuchaytiriladi
“O‘zbekiston – 2030" strategiyasining 89-maqsadida korrupsiyaga qarshi kurashish yo‘nalishidagi 2030 yilgacha erishiladigan samaradorlik ko‘rsatkichlari belgilandi.
Bu “Transparency International” xalqaro tashkilotining Korrupsiyani qabul qilish indeksida mamlakatimiz o‘rnini 50 pog‘onaga ko‘tarilishiga erishish; davlat xaridlari to‘g‘risidagi qonunchilik hujjatlari talablarini buzish holatlarini ikki barobarga kamaytirish hamda davlat xaridlarini amalga oshirishda jamoatchilik nazoratini to‘laqonli joriy qilish va yuz foiz normativ-huquqiy hujjatlarning “korrupsiyadan holi qonunchilik” tamoyili asosida ishlab chiqilishini taʼminlashdir.
“O‘zbekiston – 2030” strategiyasi doirasida korrupsiyaga qarshi kurashish sohasida belgilangan vazifalar ijrosiga bag‘ishlangan brifingdagi eng muhim qaydlar:
Davlat xaridlari to‘g‘risidagi qonunchilik hujjatlari talablarini buzganlik, manfaatlar to‘qnashuviga yo‘l qo‘yganlik uchun javobgarlikni kuchaytirish bo‘yicha ishlab chiqilgan qonun loyihasida quyidagilar taklif etilmoqda:
MJtKning 175-8-moddasining (Davlat xaridlari to‘g‘risidagi qonunchilikni buzish) sanksiyasi kuchaytirilib, jarima summasi miqdorini oshirish;
davlat xaridlariga masʼul bo‘lgan ijrochi xodimlarni javobgarlikka tortish (hozirgacha faqat mansabdor shaxslar javobgarlikka tortilgan).
Oliy taʼlim muassasalari talabalari uchun korrupsiyaga qarshi murosasiz munosabatni shakllantirishga qaratilgan YouthLed loyihasi ishga tushirildi;
Yoqilg‘i energetika, qishloq va suv xo‘jaligi, sog‘liqni saqlash, davlat xaridlari, taʼlim va yerdan foydalanish sohalarida korrupsiyaviy xavf-xatarlar tahlil qilinib, korrupsiyaning oldini olish bo‘yicha takliflar ishlab chiqildi.
