“Farzand shaxsiy mulk deb yashashni bas qilaylik”

Bolalar ombudsmani ota-onalarga murojaat bilan chiqdi:

 

"So‘nggi paytlarda bolalarga nisbatan o‘z ota-onalari yoki boshqa vasiylari tomonidan zo‘ravonlik holatlari oshayotganini OAV va ijtimoiy tarmoqlar orqali kelayotgan ko‘plab xabarlardan, Bolalar ombudsmani kotibiyatiga kelayotgan murojaatlardan ko‘ryapmiz.

 

Murg‘ak bolalarga bunday shafqatsiz va ayovsiz muomalani ko‘rib har qanday inson yuragi larzaga keladi. Har bir bola o‘z uyini eng xavfsiz va sevimli maskan, ota-onasini esa hayotning turli sinovlaridan uni himoya qiluvchi posbonlar deb anglaydi.

 

Zo‘ravonlikni tashqarida, begonalardan emas, balki eng yaqinlaridan – unga mehr-muhabbat ko‘rsatishi kerak bo‘lgan insonlardan ko‘rayotgan bolajonning ko‘nglida nima kechayotganini endi tasavvur qilib ko‘ring!

 

Bunday bolaning dunyosi ostin-ustun bo‘ladi, hayotga, ertangi kunga, insonlarga ishonchi so‘nadi. O‘z farzandi oldida ota-onalik burchini to‘g‘ri anglagan hech bir shaxs, ruhan va qalban sog‘lom inson bolasiga bunday ishni ravo ko‘rmaydi.

 

Albatta, inson hayotida turli murakkab vaziyatlarga duch kelishi mumkin, lekin bu qiyinchiliklar alamini o‘z farzandidan – o‘zini himoya qila olmaydigan ojiz boladan olish kerak degani emas!

 

Farzand – ota-onaning “shaxsiy mulki” degan fikr bilan yashashni bas qilaylik. Ota-onalar bolaga egalik qiladigan emas, unga g‘amxo‘rlik va mehr ko‘rsatishi, uning jismonan, ruhan va aqlan kamol topishi uchun barcha zarur shart-sharoitni yaratish majburiyati yuklangan insonlardir.

 

Bola tug‘ilganidanoq har qanday mustaqil inson singari barcha shaxsiy huquq va erkinliklarga egadir. Har bir bolaning huquq va manfaatlari qonun himoyasida. Mana shu qoida insonlarimiz tafakkuriga singishi kerak.

 

Hurmatli ota-onalar! Bolangizga nisbatan qilingan har qanday nojo‘ya harakat, zo‘ravonlik va tahdidning qonunan javobi bor.

 

Unutmang, bugungi xatongizni ertaga tuzatish imkoni bo‘lmasligi mumkin!

 

Davlat bolalarga hech kim, hatto ularning yaqinlari ham zarar yetkazishiga yo‘l qo‘ymaydi".