Toshkentda MFY raisi hokimlik majlisida vafot etdi
Olmazor tumani hokimligi 40 kundan beri majlis o‘tkazayotgani aytildi.
Toshkent shahrining Olmazor tumani hokimligida bo‘lib o‘tgan yig‘ilishda mahalla raisi yiqilib tushib vafot etdi. Bu haqda o‘z manbalariga tayanib, “Daryo” nashri xabar berdi.
Maʼlumotlarga ko‘ra, hokimiyat masʼullarining 40 kundan beri davom etayotgan majlisbozligi bir inson o‘limiga sababchi bo‘lgan.
"Olmazor tumanida 15 oktyabrdan beri har kuni yig‘ilish o‘tkazilyapti. 40 kundan beri ertalab 07:30 dan 08:30 ga qadar, baʼzan undan ham ko‘proq davom etayotgan yig‘ilish ishchilarning haq-huquqini poymol qilmoqda", — deydi yig‘ishda qatnashib, rais o‘limiga guvoh bo‘lgan manba.
Bugun, 24 noyabr kuni davom etgan navbatdagi majlis paytida, soat taxminan 10:00 larda “Yangi Sebzor” mahalla fuqarolar yig‘ini raisi yiqilib tushib, voqea joyida vafot etgan.
Vafot etgan rais Shavkat Murodbekov ismli fuqaro bo‘lgan.
Olmazor tumani hokimligi axborot xizmati rahbari Vitaliy Tolibjonov voqeani tasdiqlagan. Ammo qo‘shimcha maʼlumot berolmasligini, ish yuzasidan prokuraturadan axborot olish mumkinligini aytgan.
