Jinsiy qullikda saqlangan qiz bo‘yicha qo‘shimcha maʼlumot berildi
Hozirda holat yuzasidan tergov o‘tkazilmoqda.
Avvalroq Qashqadaryo viloyati Shahrisabz tumanida 14 yoshli qiz yetti oy davomida majburan saqlanib, turli shaxslar bilan jinsiy aloqa qilishga majburlab kelingani haqida xabar berilgandi. Holat yuzasidan Ijtimoiy himoya milliy agentligi munosabat bildirdi.
Aniqlanishicha, voyaga yetmagan T.Ch. Qashqadaryo viloyati Kitob tumanida yashovchi otasi G‘.J.ning qaramog‘ida bo‘lgan, onasi X.S. 2023 yil yanvar oyida Rossiyaga ishlash uchun ketgan va bugungi kungacha yashash manziliga qaytib kelmagan.
Voyaga yetmagan T.Ch.ning tog‘asi X.M. tomonidan qilingan murojaatga asosan, 2023 yilning may oyidan Shahrisabz tumanida yashovchi fuqaro N.A. o‘zining uyida 7 oy davomida majburan saqlab kelib, zo‘rlik va tahdid orqali turli shaxslar bilan jinsiy aloqa qilishga majburlagani yuzasidan huquqni muhofaza qiluvchi organlar tomonidan tegishli surishtiruv ishlariga kirishilgan.
“Voyaga yetmagan T.Ch.ning jismoniy va ruhiy salomatligini tiklash hamda mazkur holatning kelib chiqish sabablari va uni bartaraf etish choralari yuzasidan "Ijtimoiy ish" ochilgan. Holat yuzasidan kompleks o‘rganishlar davom ettirilayotganligini maʼlum qilamiz”, - deyiladi xabarda.
Maʼlumot o‘rnida, Kitob tumani prokurori tomonidan fuqaro N.A.ga nisbatan JKning 135-moddasi (odam savdosi, voyaga yetmagan shaxsga nisbatan) 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
