Endi Hajga borish uchun navbatda turgan fuqarolar ro‘yxati ochiq eʼlon qilinadi
Bu Prezidentning tegishli farmonida belgilab qo‘yilgan.
Endi Haj tadbiriga borish uchun navbatda turgan ziyoratchilarning yagona onlayn navbati to‘g‘risidagi maʼlumotlar eʼlon qilib boriladi. Bu haqda Prezident tomonidan imzolangan tegishli farmonda nazarda tutilgan.
Hujjat korrupsiyani oldini olish va unga qarshi kurashish sohasida olib borilayotgan ishlarning natijadorligini oshirish, muhim ijtimoiy masalalarga oid ochiq maʼlumotlar ko‘lamini yana-da kengaytirish, ulardan to‘siqlarsiz foydalanishni taʼminlash, shuningdek, “O‘zbekiston – 2030” strategiyasida belgilangan vazifalarni amalga oshirish maqsadida qabul qilindi.
Unga ko‘ra, shu yil 1 dekabrdan boshlab hududlar kesimida Haj tadbiriga borish uchun navbatda turgan ziyoratchilarning yagona onlayn navbati to‘g‘risidagi maʼlumotlar ochiq maʼlumotlar sifatida joylashtiriladi.
Ro‘yxatdan ziyoratga boruvchi shaxsning arizasi navbatga qo‘yilgan sana va ro‘yxatdagi tartib raqami joy oladi.
Maʼlumot uchun, Haj tadbiriga borish uchun navbatda turgan ziyoratchilarning yagona onlayn navbati to‘g‘risidagi maʼlumotlarni ochiq eʼlon qilinishi kerak bo‘lgan ijtimoiy ahamiyatga molik maʼlumotlar ro‘yxatiga kiritish taklifi Korrupsiyaga qarshi kurashish agentligi tomonidan ilgari surilgan.
