Qashqadaryoda 26 yoshli ayol tug‘ruqdan keyin shifoxonada vafot etdi
Joriy yilning avgust oyida Qarshi tumanida ham egizak farzand tuqqan 19 yoshli ayol vafot etgandi.
Chiroqchi tumani tibbiyot birlashmasi reanimatsiya bo‘limida 26 yoshli ayol vafot etdi. Bu haqda ijtimoiy tarmoqlarda xabar tarqalgach, viloyat sog‘liqni saqlash boshqarmasi rasmiy maʼlumot berdi.
Maʼlum qilinishicha, Chiroqchi tuman "G‘allachi" mahallasida yashovchi, 1997 yilda tug‘ilgan A.G. shu yilning 10 oktyabr kuni soat 06:00da qarindoshlari tomonidan tug‘ruq bo‘limiga olib kelingan.
Qayd etilishicha, ayolda oxirgi ko‘rik 2023-yil 13-sentabrda, homiladorlikning 33-haftasida o‘tkazilgan. Bunda ayolga yotib davolanish tavsiya qilingan, lekin ayol davolanishga bormagan.
Bo‘limga kelganida ayolning umumiy ahvoli qoniqarli baholangan. 10 oktyabr kuni soat 16:10 da vazni 3 400 og‘irlikdagi o‘g‘il chaqaloqni dunyoga keltirgan. 2023-yil 12-oktabr kuni ertalab soat 5-6 lar oralig‘ida ayolning ahvoli og‘irlashib, qornida kuchli og‘riq paydo bo‘lgan. Og‘riqlar kuchaygach, birlashma xirurg vrachlari jalb qilingan, shundan so‘ng viloyatdan jarroh, akusher-ginekolog va nefrolog chaqirilgan. So‘ng bemorda operatsiya o‘tkazilgan.
Operatsiyadan keyin ayolga tegishli muolajalar qilingan. Ammo ayolning umumiy ahvoli og‘irlashgan, qilingan barcha muolajalarga qaramay u 2023-yil 16-oktabr kuni soat 02:30 da vafot etgan.
Mazkur ona o‘limi holati viloyat sog‘liqni saqlash boshqarmasi kengaytirilgan yig‘ilishida muhokama qilingan va bu borada tegishli choralar belgilangan.
Ayni paytda mazkur holat Chiroqchi tumani prokuraturasi tomonidan o‘rganilmoqda.
