Bloger Olimjon Haydarovga sud hukmi o‘qildi
Tovlamachilik va yana bir nechta ayblovlar bilan qamoqqa olingan blogerga jazo tayinlandi.
1-dekabr kuni jinoyat ishlari bo‘yicha Farg‘ona tuman sudida farg‘onalik bloger Olimjon Haydarovga oid jinoyat ishini ko‘rib chiqish bo‘yicha ochiq sud jarayoni yakunlanib, sud hukmi eʼlon qilindi. Bu haqda Oliy Sud Matbuot xizmati xabar berdi.
Jinoyat ishlari bo‘yicha Farg‘ona tuman sudining raisi A. Ergashev eʼlon qilgan hukmga ko‘ra, Haydarovning ayblovidan JKning 165-moddasi 2-qismi “a” bandi chiqarilib, u JKning 139-moddasi (tuhmat) 2-qismi, 3-qismi “a” bandi, 140-moddasi (haqorat qilish) 3-qismi “a” bandi va 165-moddasi (tovlamachilik) 2-qismi “b” bandida nazarda tutilgan jinoyatlarni sodir etganlikda aybdor deb topildi.
Unga JKning 59 (bir necha jinoyat sodir etganlik uchun jazo tayinlash) va 61 (jazolarni qo‘shishning hisoblash qoidalari) moddalari tartibida 8 yil muddatga ozodlikdan mahrum qilish jazosi tayinlandi. Tayinlangan jazoni umumiy tartibli koloniyalarda o‘tash belgilandi.
Shuningdek, Majburiy ijro byurosi zimmasiga ijtimoiy tarmoqlardagi O. Haydarovga tegishli barcha kanal, sahifa va guruhlarni hukm qonuniy kuchga kirgandan so‘ng o‘chirilishi (bloklanishi)ni taʼminlash yuklatildi.
Eslatib o‘tazmiz, joriy yilning 29 iyul kuni Farg‘ona viloyati huquq-tartibot organlari tomonidan o‘tkazilgan tezkor tadbir jarayonida bloger Olimjon Haydarov tovlamachilik ustida qo‘lga olingan edi.
