Farg'onada 2 ta “zapravka” gazdan uzib qo'yildi
AGTKShlar faoliyatida aholi hayotiga xavf tugʻilishi bilan bogʻliq boʻlgan qoʻpol qoidabuzarliklar aniqlangan.
Fargʻona viloyatida xavfsizlik choralari koʻrilmagan 2 ta AGTKSh gaz taʼminotidan ajratildi, deya xabar bermoqda Energetika vazirligi.
“Oʻzenergoinspeksiya” Fargʻona viloyati hududiy boshqarmasi tomonidan Fargʻona tumanida joylashgan “I.G.S.” MCHJ hamda Fargʻona shahridagi “F.C.B.” MCHJga qarashli avtomobillarga gaz toʻldirish kompressor shoxobchalarida oʻrnatilgan texnologiya jarayonlarining va texnologik asbob-uskunalarining amaldagi meʼyor va qoidalarga muvofiqligi, tabiiy gazni qabul qilib olish, saqlash, tarqatilishi holatlari yuzasidan oʻrganish oʻtkazilgan.
Oʻrganish jarayonida AGTKShlar faoliyatida aholi hayoti va sogʻligʻiga xavf tugʻilishi bilan bogʻliq boʻlgan qoʻpol qoidabuzarliklar aniqlangan.
Ushbu holat yuzasidan mutasaddilarga kamchiliklarni bartaraf etish boʻyicha koʻrsatmalar berildi hamda mazkur AGTKShlar yuqoridagi kamchiliklar bartaraf etilgunga qadar (10 kun muddatgacha) tabiiy gaz taʼminotidan ajratildi.
