Toshkentda Yangi Nafas — ekiden ommaviy yugurish musobaqasi o‘tkaziladi
Joriy yilning 10 dekabr kuni Konstitutsiya kuniga bag‘ishlangan jamoaviy musobaqalar bo‘lib o‘tadi.
Joriy yilning 10 dekabr kuni soat 11:00 da Yangi Nafas xalqaro sport harakatining boshqaruvi ostida O‘zbekiston Respublikasi Konstitutsiyasi qabul qilingan kunga bag‘ishlangan jamoaviy musobaqalar bo‘lib o‘tadi.
Yangi Nafas – ekiden musobaqalari erkaklar, ayollar va aralash estafetada o‘tkaziladi. Tasdiqlangan nizomga asosan, aralash estafeta tarkibida kamida 2 ta ayol va eng ko‘pi bilan 5 ta erkak bo‘lishi kerak. Jamoada 6 nafar erkak va 1 nafar ayol ishtirok etadigan holda, jamoa erkaklar toifasida ishtirok etadi.
Ayni paytda iticket.uz saytida ro‘yxatdan o‘tish jarayoni ochiq bo‘lib, quyidagi havola orqali o‘tish mumkin:
Yangi Nafas – Ekidenning g‘alaba qozongan jamoalariga tashkilotchilar tomonidan quyidagi pul mukofotlari topshirilishi ko‘zda tutilgan:
• 1-o‘rin uchun - 7 000 000 so‘m
• 2-o‘rin uchun - 5 000 000 so‘m
• 3-o‘rin uchun - 3 000 000 so‘m
Musobaqani tashkil etishda Oliy taʼlim, fan va innovatsiyalar vazirligi, Sog‘liqni saqlash vazirligi, Ichki ishlar vazirligi, Favqulodda vaziyatlar vazirligi, Maktabgacha va maktab taʼlimi vazirligi, O‘zbekiston Respublikasi Yoshlar siyosati va sport vazirligi, “O‘zbekneftgaz” AJ, O‘zbekiston yengil atletika federatsiyasi va bir qator tashkilotlar ishtirok etmoqda.
