Toshkentda yo‘lovchi avtobusdan yiqilib jarohatlandi
Holat yuzasidan “Toshshahartransxizmat” AJ izoh berdi.
Kecha, 10-dekabr kuni Toshkent shahrining Mirzo Ulug‘bek tumanida avtobus va yo‘lovchi ishtirokida yo‘l-transport hodisasi sodir bo‘ldi.
Holat soat 15:30 larda Mirzo Ulug‘bekr tumani Qorasuv mavzesida yuz bergan. "Yunusobod mavzesi 9 dahasi – Chingeldi mahallasi" yo‘nalishida harakatlanayotgan avtobus “Universam bekati”da yo‘lovchilarni to‘liq tushurib-chiqarib bo‘lmasdan harakatlanishi oqibatida avtobusga hali chiqib ulgurmagan yo‘lovchi yiqilib tushib tan jarohati olgan.
Yo‘l-transport hodisasi sodir bo‘lgan joyga darhol tez-tibbiy yordam xodimlari chaqirilgan. Tashxis natijalariga ko‘ra, yo‘lovchi yuz qismi peshonasidan yengil tan jarohati olganligi hamda o‘ng qo‘li singanligi aniqlangan.
Hozirda ushbu yo‘l-transport hodisasi Toshkent shahar IIBB YHXB xodimlari tomonidan rasmiylashtirilib, dastlabki tergov va surishtiruv ishlari olib borilmoqda.
