Prezident Qatar delegatsiyasini qabul qildi
Uchrashuvda O‘zbekistonda o‘tadigan muhim marosimga tayyorgarlik ishlari ko‘rib chiqilgan.
Prezident Shavkat Mirziyoyev 15 dekabr kuni Qatar Davlatining Qonun ustuvorligini taʼminlash va korrupsiyaga qarshi kurashish bo‘yicha markazi Vasiylik kengashi raisi Ali Muhsin al-Marriy boshchiligidagi delegatsiyani qabul qildi.
Uchrashuv avvalida rais al-Marriy davlat rahbariga Qatar Amiri Tamim bin Hamad Ol Soniyning salomi va eng ezgu tilaklarini yetkazdi.
O‘zbekiston bilan Qatar o‘rtasidagi ko‘p qirrali munosabatlar jadal rivojlanib borayotgani mamnuniyat bilan qayd etildi. O‘zaro savdo va investitsiyalar hajmi ortmoqda, yirik qo‘shma loyihalar tayyorlanmoqda va amalga oshirilmoqda.
Bo‘lajak muhim xalqaro tadbir – Qatar Amiri tashabbusi bilan taʼsis etilgan “Korrupsiyaga qarshi kurashishda ulkan yutuqlar uchun” global mukofotini topshirish marosimini O‘zbekistonda o‘tkazishga tayyorgarlikning borishi ko‘rib chiqildi.
Korrupsiyaga qarshi kurashish sohasida amaliy hamkorlikni yana-da kengaytirish, tajriba almashish va qo‘shma taʼlim dasturlarini amalga oshirishdan ikki tomon ham manfaatdor ekani tasdiqlandi.
