O‘zingizni asrang! Koronavirus mutatsiyaga uchrashda davom etmoqda
Ayni paytda shifoxonaga yotqizish holatlari bo‘yicha JSSTga maʼlumot taqdim etayotgan mamlakatlarning qariyb yarmida kasallikning o‘sish tendensiyasi kuzatilmoqda.
COVID-19‘ning ilk o‘choqlari aniqlanganidan buyon to‘rt yil vaqt o‘tdi. Ammo virus hanuz oramizda, atrofimizda. Hamon odamlar hayoti va salomatligiga xavf solib turibdi.
Jahon sog‘liqni saqlash tashkilotining Rossiyadagi rasmiy vakili Melita Vuynovichning taʼkidlashicha, o‘tgan davrda koronavirus insoniyatga moslashdi va mutatsiyaga uchrashda davom etmoqda.
Mutaxassis so‘zlariga ko‘ra, qish mavsumi kelishi bilan Yevropa va Markaziy Osiyo mintaqalarida COVID-19 bilan birga nafas yo‘llarining boshqa patogenlari ham ko‘p uchramoqda. Ushbu infeksiya hamon og‘ir holatlar va bemorlar o‘limiga sabab bo‘layotgani achinarlidir.
Ayni paytda shifoxonaga yotqizish holatlari bo‘yicha JSSTga maʼlumot taqdim etib borayotgan mamlakatlarning qariyb yarmida kasallikning o‘sish tendensiyasi kuzatilmoqda. Finlyandiya, Slovakiya va Italiya shular jumlasidan.
Ekspert mavjud epidemiologik vaziyatdan kelib chiqib, aholi gavjum joylarda tibbiy niqob taqish zaruriy profilaktika chorasi ekanini taʼkidladi. Bunga, birinchi navbatda, xavf guruhiga mansub aholi qatlami — keksalar, qandli diabet va yurak-qon tomir xastaliklari bor bemorlar, immuniteti zaif kishilar va homilador ayollar amal qilishlari kerak.
Eslatib o‘tamiz, hozir Yer yuzida qayd etilayotgan barcha shtammlar "omikron" mutatsiyalaridir. Xususan, "Eris" deb nomlangan EG.5 varianti sayyoramiz bo‘ylab tarqalgan SARS-CoV-2 versiyalarining yarmidan ko‘pini tashkil qiladi. Bundan tashqari, baʼzi mamlakatlarda HV.1, "Kraken", JN.1 hamda ВА.2.86 mutatsiyalari dominant variantlarga aylangan.
