Qashqadaryoda 17 yoshli qizning to‘yi to‘xtatildi
Voyaga yetmagan qizga shaʼriy nikoh o‘qigan diniy vakilga javobgarlikka tortilgan.
Bolalar ombudsmani Surayyo Rahmonova erta nikohlar va maktab yoshidagi qizlarga nisbatan unashtiruv marosimlarini o‘tkazilishi kabi salbiy holatlar yuzasidan Qashqadaryo viloyatining Ko‘kdala, Kasbi va Koson tumanlarida o‘rganishlar o‘tkazdi.
Tashkil qilingan uchrashuvlarda farzandlarini erta turmushga bermoqchi bo‘lgan ota-onalar ham chaqirtirilib, ularga erta nikohning salbiy oqibatlari tushuntirilgan. Bu holatlarga yo‘l qo‘ygan ota-onalar Maʼmuriy va Jinoyat kodekslari bilan belgilangan javobgarlikka tortilishi eslatilgan.
Bolalar ombudsmani unashtiruv marosimi o‘tkazilgan deb ijtimoiy tarmoqlarda xabar tarqagan har bir qiz bilan uchrashib, ular bilan alohida xoli suhbat o‘tkazgan.
Shuningdek, tumanlarda o‘rganish va tahlillar olib borilgan. Bugun, 23 dekabr kunining o‘zida tuman hokimiyati bilan birgalikda Koson tumanidagi bir oila 17 yoshli qizini to‘yi belginganligi aniqlangan, to‘y va unga bog‘liq barcha marosimlar to‘xtatilgan. FHDYO tomonidan qayd etilgan nikoh guvohnomasi bo‘lmay sharʼiy nikoh o‘qigan diniy vakil javobgarlikka tortilishi choralari ko‘rilgan.
