Shavkat Mirziyoyev Ilhom Aliyev bilan telefonlashdi
Prezident Ozarbayjon yetakchisini tug‘ilgan kuni bilan tabrikladi.
24 dekabr kuni Prezident Shavkat Mirziyoyevning Ozarbayjon Respublikasi Prezidenti Ilhom Aliyev bilan telefon orqali muloqoti bo‘lib o‘tdi.
Davlat rahbari Ozarbayjon yetakchisini tavallud kuni bilan dildan qutlab, qardosh ozarbayjon xalqiga farovonlik va ravnaq tiladi.
Prezident Ilhom Aliyevning bugungi Ozarbayjonning hududiy yaxlitligi va shiddatli taraqqiyotini taʼminlashdagi shaxsiy hissasi va tarixiy o‘rni alohida qayd etildi.
Davlat rahbarlari O‘zbekiston-Ozarbayjon munosabatlarida yuksak darajaga – strategik sheriklikka erishilganini katta mamnuniyat bilan taʼkidladilar.
Tovar ayirboshlash hajmi 2023 yilda 30 foizga oshdi, mashinasozlik, to‘qimachilik, pillachilik, qishloq xo‘jaligi, neft-gaz majmuasi, turizm va ko‘plab boshqa tarmoqlarda istiqbolli kooperatsiya loyihalari faol tayyorlanmoqda va amalga oshirilmoqda.
O‘zbekiston va Ozarbayjon yetakchilari Ikki tomonlama munosabatlarni jadal rivojlantirish yilida amaliy hamkorlikning 10 ta yangi yo‘nalishini shakllantirishga kelishib oldilar.
Shuningdek, 2024 yilga mo‘ljallangan tadbirlar rejasi ko‘rib chiqildi. O‘zbekiston Prezidenti Ozarbayjon rahbariga ushbu mamlakatda bo‘lajak Prezident saylovi muvaffaqiyatli o‘tkazilishini tiladi.
